Numri i të arrestuarve nga megaoperacioi “Rrjeti” ka shkuar në 54.
Kjo pasi ditën e sotme janë arrestuar dy pjesëtarë të tjerë të grupit kriminal që vepronte në qytetin e Elbasanit.
Dy personat e arrestuar ditën e sotme janë 35-vjeçari Migel Balla dhe 34-vjeçari Migen Kucaj.
Këta persona janë lënë në masën e sigurisë arrest me burg nga Gjykata e Elbasanit për veprën penale të prodhimit dhe trafikut të lëndëve narkotike.
Në kërkim mbeten dhe 3 persona.
Njoftimi i Policisë:
Të dy këta shtetas akuzohen se janë pjesëtarë të një rrjeti kriminal për prodhimin, shitjen dhe trafikimin e llojeve të ndryshme të drogave, veprimtari kriminale e cila u godit nga Policia e Elbasanit, më datë 29 qershor 2023, në kuadër të megaoperacionit policor antidrogë të koduar “Rrjeti”. Për këtë megaoperacion janë vënë në pranga 54 shtetas në total, si dhe janë sekuestruar sasi dhe doza të drogave të ndryshme, armë zjarri, municion luftarak, armë të ftohta dhe shuma të mëdhaja parash në valuta të ndryshme. Vijon puna për kapjen e 3 shtetasve të tjerë të shpallur në kërkim në kuadër të këtij megaoperacioni. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
Në operacionin që u shtri në disa qytete të qarkut të Elbasanit (Elbasan, Cërrik, Peqin, Belsh, Librazhd, Prrenjas) si dhe në Pogradec morën pjesë 490 punonjës policie, 5 dronë, u kontrolluan me dhjetëra banesa e lokale. Gjatë operacionit, janë sekuestruar kokainë, heroinë, kanabis, armë zjarri, municione, pjesë përbërëse të armëve të zjarrit dhe shuma të mëdha parash.
j.l./ dita
