Duket se kryebashkiaku aktual i Tiranës do të thyejë rekordin e diferencës së votave mes rivalëve të mbajtur ndonjëherë. Në Bashkinë Tiranë, nga 941 qendra votimi në total, deri më tani janë numëruar 758 prej tyre. Kandidati i PS, Erion Veliaj, thelloi përsëri rezultatin dhe drejt fitores i sigurt me 54.45% (125.670 vota). Sakaq, kandidati i koalicionit “BF”, Belind Këlliçi ndjek në vendin e dytë me 34.79% (80.301), me mbi 45 mijë vota diferencë. Më tej kandidatët e partive të tjera, më konkretisht Arlind Qori i Lëvizjes Bashkë ka marrë deri tani 4.77% të votave. Roland Bejko i PD-së me 4.28%. Nga ana tjetër Lajla Përnaska e PDIU me 0.75%, ndërsa Marko Dajti i Frontit të Majtë ka 0.94%.
Edhe në Bashkinë Kavajë vijon procesi i numërimit. Në rezultatin e 49 kutive nga 92, Fisnik Qosja i ‘Bashkë Fitojmë’ merr vetëm 49.24% përballë 50.76% të Redjan Kralit të PS. Në Bashkinë Rrogozhinë ka përfunduar numërimi dhe kryeson Edison Memolla me 50.11% dhe kandidati i BF Shkëlqim Hoxha merr 49.89%. Diferenca është e ngushtë me vetëm 23 vota. Partia Socialiste ka fituar thellë në Kamëz, me Rakip Sulin që ka marrë 60.36 përqind të votave, ndërkohë që kandidati I Berishës ka marrë vetëm 35.32 % të votave. Kandidati i PD Bilbil Bajraktari ka marrë vetëm 4.3%. Edhe në Vorë socialistët kanë marrë një rezultat spektakolar. Janë numëruar 44 nga 44 kuti dhe Blerim Shera ka marrë 73.5 %të votave ndërsa Indrit Hoxha vetëm 26.5 përqind.
