Veliu, Saliu dhe “debatikas” Hulusiu… Kulmi i një maskarade me veteranët

Nga Xhevdet Shehu

Botuar në DITA

Kemi disa javë që flasim e shkruajmë për një farsë të ulët, për uzurpimin e kreut të Organizatës Kombëtare të Veteranëve dhe Pasardhësve të Luftës Antifashiste Nacionalçlirimtare të Shqipërisë. Kjo organizatë është shpallur “Nderi i Kombit” për vlerat që trashëgon nga e kaluara e ndritur e asaj lufte, për rolin që i takon të luajë për ruajtjen dhe trashëgimin e këtyre vlerave të patjetërsueshme. Në DITA është demaskuar përpjekja e një klani marifetçinjsh për kapjen e kësaj organizate, ku protagonist është Veli Myftari, një ish-i dënuar në tre shkallë gjyqësori për korrupsion.

Pjesa e fundit e kësaj maskarade u luajt më 10 prill 2023 në sallën UNESCO të Muzeut Historik Kombëtar. Takimi ishte për zgjedhjen e kryetarit të ri të Komitetit Kombëtar të kësaj organizate. Para se të tregojmë se si përfundoi kjo mbledhje, le të shikojmë se erdhën punët deri në këtë pikë, sipas nënkryetarëve të Organizatës, Dr. Elidiana Canajt, Vjollca Trebicka Konda dhe Murat Dardha, të cilët kanë kundërshtuar në vijimësi arbitraritetin dhe shkeljet e Myftarit dhe klanit të tij.

***

Mënyrat e Veliut të kujtojnë tëpkë Saliun. Myftari ka konsumuar shkelje të njëpasnjëshme ligjore, statutore duke u vetëdeklaruar në krye të Organizatës si “amanet” i të ndjerit kryetar. E shpalli “amanetin” në të 40-at e ndarjes së tij nga jeta!

Ky është një nga absurditetet më të mëdha që kemi dëgjuar, pasi Organizata e Veteranëve dhe Pasardhësve, nuk është pronë private dhe nuk mund të trashëgohet me testamente apo amanete.

Myftari thirri Kryesinë e Komitetit Kombëtar pa marrë në konsideratë mendimin kolegjial të drejtuesve kryesorë të zgjedhur. Kështu nënkryetarët u detyruan të bashkëdrejtojnë, të raportojnë për detyrat, përgjegjësit, problemet, programet e punës si edhe të përcjellin sugjerimet e propozimet e tyre për vendimmarrje ne mbledhjen e kryesisë. Myftari nuk u prononcua për mbylljen e mbledhjes dhe për vendimet. Nënkryetarët insistuan të konfirmohen vendimet e mara me shkrim dhe të respektohet ndjekja e zbatimit të vendimeve. Ende nuk e dimë arsyen pse nuk prononcohet për këto vendime dhe vendos veton për gjithçka, zoti Veli.

Pra nuk pranon që kryesia e datës 03.02.2023 ka marrë vendime të rëndësishme për të menaxhuar situatën e krijuar. Nuk pranoi të botojë vendimet në gazetë dhe as u morën masa për ndjekjen e zbatimit të tyre. Gjithsesi u ngrit komisioni i kontrollit të brendshëm financiar! U ngrit komisioni i administrimit të kërkesave për kandidatët për kryetar të Komitetit Kombëtar.

U ngrit, por zoti Veli as këtë komision të përbërë nga profesorë të nderuar, si Fatos Tarifa, Ksenofon Krisafi, Pëllumb Xhufi, Spartak Braho e të tjerë, te zgjedhur edhe në organet drejtuese e vendimmarrëse të organizatës, nuk e njeh! Thirri në emër të tij kryetarët e komiteteve të organizatave në bashki. Mbledhja nuk ia arriti qëllimit.

Tre nënkryetarët me vendim kolegjial thirrën mbledhjen e të gjithë anëtarëve të kryesisë ku u ftua edhe komisioni i administrimit të dokumenteve të kandidatëve për kryetar të Komitetit Kombëtar. Veliu nuk pranoi të merrte pjesë. Thirri në mbledhje edhe ai kryesinë (pjesën e mbetur nga mbledhja e ligjshme). Këtu, propozoi profesor Hulusi Hakon si kandidat, meqenëse nuk e arriti kapjen personale të këtij posti.

Me këto veprime arbitrare, sa i besueshëm mund të jetë ky person për organizatën?! Edhe pse aty u propozuan dy kandidatura për t’ia përcjellë Komitetit Kombëtar për votim e vendimmarrje, por njëherësh boton ne gazetë “letrën e hapur” të nënshkruar (!) nga 7 kryetarë komitetesh në bashki, ku i kërkon dorëheqjen Profesor. As. Dr. Bernard Zotajt (?!)

Myftari na qenka “i ligjshëm”, ndërsa drejtuesit e tjerë të zgjedhur (nënkryetarët) janë “konsultativë”, sipas tij! Çuditë nuk kanë të sosur!

Menjëherë pas mbledhjes së datës 03.02.2023, botoi vendimin e gjykatës së Tiranës për reflektimin e ndryshimeve në Statut. Sipas këtij vendimi: çuditërisht është miratuar z. Veli si sekretar i Përgjithshëm në vend të sh. Servet Agalliu dhe nuk ka as kryetar komiteti e as nënkryetarë, as kryesi, as komitet! Edhe pse ndryshimet janë miratuar me 20.11.2021, ndërsa z. Veli është konfirmuar në detyrë shumë më vonë. Gjithsesi i ndjeri Odhise Porodini ishte në detyrë! Me këtë vendim gjykate z. Veli është “i ligjshëm”, ndërsa drejtuesit e tjerë janë konsultative, jo vendimmarrës.

Shkurt, Myftari nuk i njeh strukturat vendimmarrëse në organizatë! Nuk njeh e nuk respekton dokumentet e Organizatës! Ka edhe shkelje të tjera! Nuk është korrekt emërtimi i organizatës! Organizata quhet “e Veteranëve të Luftës Nacionalçlirimtare”. Këtu mungon cilësimi “dhe Pasardhësve të LANÇ të Popullit Shqiptar “Nderi i Kombit”. Mungon termi Antifashist. Dmth nuk përmendet vazhdimësia e anëtarësisë së organizatës. Nuk përmendet karakteri antifashist i luftës së Popullit Shqiptar. Nuk përmendet titulli “Nderi i Kombit” akorduar me dekret presidencial.

Pse kanë ndodhur këto shkelje e pasaktësi? Janë lapsuse? Veliu nuk kthen përgjigje! Madje nuk ndërmerr asnjë hap për të atakuar vendimin! Përgjigja e tij, me nje qetësi te shtirur dhe jo pa ironi: “i ka statuti ndryshimet, nuk ka nevojë t’i ketë vendimi i gjykatës!”

Më tej: Veli Saliu nuk pranon të bisedojmë! Si uzurpues ai “drejton” në mënyrë autarkike e jo demokratike! Nuk njeh organet e zgjedhura, por shtabin me miq e të besuar personalë si edhe administratën. A do të vazhdojë edhe më tej ky turp në krye të organizatës sonë?

***

Sikurse thamë në hyrje, kulmi i kësaj maskarade u shënua në mbledhjen e 10 prillit. Unë isha pjesëmarrës në atë mbledhje që zgjati disa orë, si gazetar, por edhe si anëtar i këtij Komiteti Kombëtar. Aty pashë lojën mjerane që po luhet. Nga fillimi deri në fund më ngjau vetja si pjesëmarrës në mitingjet e Saliut. Me të bërtitura, me urdhra, me falsifikime dhe me demagogji të paskrupullt. Veli Saliu bënte ligjin dhe nuk pyeste kurrëkënd për zhvillimin normal të mbledhjes dhe për unifikimin e organizatës. Jo. Ai donte që me çdo kusht të zgjidhej në krye të organizatës Hulusiu, 95 vjeçar, pavarësisht se përballë tij ishte edhe një kandidaturë tjetër dinjitoze Prof. Bernard Zotaj.

Po bëj një portretizim të të dy kandidaturave.

Hulusi Hako u deklarua si veteran, si ish-debatikas në Delvinë. Debatiku ka vepruar si organizatë pionierësh vetëm në Tiranë dhe askund tjetër. Hulusiu nuk ka qenë debatikas dhe as partizan asnjë ditë të vetme. Ky veteran i orëve të fundit, gjatë gjithë jetës nuk ka bërë qoftë edhe një shkrim të vetëm në mbrojtje të Luftës Antifashiste dhe të Dëshmorëve të saj! Nuk ka asnjë meritë në e Organizatës së Veteranëve të LANÇ-it përgjatë viteve dhe nuk është parë askund në ndonjë veprimtari publike të saj. Si pedagog ka dhënë lëndën e Ateizmit, e ka me qejf të shajë Papën e Romës, edhe sot njëlloj si në vitin 1967! Si për ironi, aventura e tij me Organizatën u krye në ditën e pashkëve katolike!

Kandidati tjetër, Bernard Zotaj, 25 vjet më i ri, është një ish-ushtarak dhe historian, pasardhës veterani dhe familje dëshmorësh. Ka botuar dhjetëra libra dhe qindra artikuj në mbrojtje të Luftës Antifashiste dhe dëshmorëve të saj. Sidomos vitet e fundit, kur falangat neoballiste dhe neofashiste janë vërsulur me tërbim kundër Luftës sonë dhe dëshmorëve të saj, ai ka qenë në ballë të kësaj krahas emrave të tjerë.

Arsyeja pse u propozua Bernardi si kandidat për kryetar të organizatës është tejet bindës: Pas rreth 80 vjetësh nuk kemi një luftë të nxehtë me armë në dorë kundër ballistëve dhe bashkëpunëtorëve të pushtuesve fashistë, por një “luftë të ftohtë” që vazhdon prej më shumë se 30 vjetësh. Janë rrëmbyer “armët” e propagandës për të njollosur Luftën Antifashiste dhe dëshmorët e saj. Mbrojtjen dhe moscenimin e vlerave të Luftës dhe të dëshmorëve e kanë marrë në dorë bijtë dhe bijat e ish-partizanëve dhe të dëshmorëve, dhe Bernard Zotaj është dalluar në këtë betejë. Prandaj dhe u propozua si kandidat për kryetar. Pasi kjo betejë mund të vazhdojë gjatë dhe vlerat e Antifashizmit do të duhet të jetojnë gjatë dhe të jenë model edhe për brezat që vijnë.

Le të kthehemi tek mbledhja e datës 10 prill. Në një rrëmujë totale Veliu vetë fliste dhe vetë vendoste, si ajo shprehja që qarkullonte në kohën Zogut: Lal Kros o Lal Kros, vetë shkruan vetë vulos! Në një moment tërthorazi quajti destruktiv rolin e gazetës DITA që ka botuar opinionet e disa akademikëve, profesorëve dhe figurave publike mbi këto zhvillime të javëve të fundit në Organizatën e LANÇ-it, duke dashur të fshehë rolin e tij thellësisht përçarës në organizatë. Ia thashë në sy dhe po ia përsëris: Ky çapaçul nuk barabitet dot me Ditën në mbrojtje të vlerave të LANÇ-it dhe të dëshmorëve.

Nga 94 anëtarë të Komitetit me të drejtë vote, mbi dy të tretat ishin kundër Veliut dhe për pasojë kundër kandidaturës së Hulusiut. Por Veliu këmbëngulte që votimi të bëhej i hapur dhe jo i mbyllur për dy kandidaturat. Për të realizuar këtë synim, këtë farsë, i erdhi në ndihmë avokatia e Idajet Beqirit. Me ca arsyetime amorfe avokati “legjitimoi” votimin e hapur si “më demokratik”. Kështu ka bërë gjithnjë edhe Saliu kur uzurpon bazuar te frika dhe shantazhet. Votimi u bë i hapur dhe të përzgjedhurit e Veliut numëronin duart përpjetë të votuesve. Disa të thirrur nga Veliu ngrinin të dy duart (sikurse shihet dhe në foton që shoqëron këtë shënim).

Si përfundim, e shpallën veten shumicë. Por… duke harruar se i kanë bërë një dëm të pallogaritshëm organizatës. E gjithë kjo do t’u kthehet në bumerang dhe do tregohen me gisht si sabotatorë të një kauze të madhe.

Pastaj festuan “triumfin”. Ata që votuan për kryetarin e ri 95 vjeçar, u gostitën në një koktejl ku kishte me shumicë sallam dhe salçiçe. U ngopën. Doemos, ishin gratis! Për zhvillimet e mëpastajme pritet të shkruajë më hollësisht B.Koçi në gazetën Kushtrim Brezash, sipas urdhrave të Veli Hulusiut.

Një shënim i shkurtër:

Pas mbledhjes së 10 prillit dhe pasi kisha mbaruar këtë shkrim, mora disa mesazhe nga historianë dhe pasardhës veteranësh. Ata më njoftuan se kanë ndërmarrë nismën për krijimin e një Organizate të re dhe bashkëkohore, emërtimi i së cilës do të jetë pak a shumë i tillë: “Organizata për Mbrojtjen e Vlerave të Antifashizmit në Shqipëri”.

——

©Copyright Gazeta DITA

Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.