Një tjetër magjistrat i thotë ‘lamtumirë’ sistemit të drejtësisë. Kolegji i Posaçëm i Apelimit ka lënë në fuqi vendimin për shkarkimin nga detyra të gjyqtarit të Apelit të Vlorës, Hysen Saliko.
Vendimi për shkarkimin e Salikos u mor nga Komisioni i Pavarur i Kualifikimit, më 3 gusht të vitit 2020, për shkak të problemeve me pasurinë. Pas ankimimit të bërë nga gjyqtari, trupi trupi gjykues i KPA, i përbërë nga Natasha Mulaj kryesuese, Sokol Çomo relator, Albana Shtylla, Mimoza Tasi, Rezarta Schuetz si anëtarë, la në fuqi të njëjtin vendim. Hysen Saliko e ka filluar karrierën në sistemin gjyqësor në vitin 1994. Deri në vitin 2006, Saliko ka ushtruar detyrën si kryetar i Gjykatës Kolonjë dhe në vitin 2006 është transferuar si inspektor në ish-Këshillin e Lartë të Drejtësisë. Në vitin 2010, Saliko është emëruar gjyqtar në Gjykatën e Apelit Vlorë. Analiza e pasurisë ishte një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Gjyqtari Hysen Saliko nuk ka mundur që të justifikojë pasurinë e tij, të ngritur ndër vite.
