VIDEO: Ambasadorja e SHBA-ve në Athinë, vizitë në Kryeministri në orët e vona të natës

Një vizitë misterioze është regjistruar mbrëmjen e të mërkurës në Kryeministri.

Në ambientet e godinës është parë të hyjë Kimberly Guilfoyle, ambasadorja e Shteteve të Bashkuara në Athinë, e cila është pritur që në hyrje nga kryeministri Rama.

Këto pamje, të xhiruara rastësisht nga një telefon celular në zonën e parkut të Piramidës, tregojnë momentin e takimit mes tyre.

Video e marrë nga Klan:

Guilfoyle për një periudhë të gjatë ajo ka bashkëjetuar me djalin e presidentit, Donald Trump Jr., dhe prej vitesh njihet si një nga figurat kyçe të rrethit të ngushtë të Trump në politikën amerikane.

Vizita e ambasadores Guilfoyle në Kryeministri nuk është njoftuar zyrtarisht dhe Kryeministria nuk pranoi ta komentojë takimin.

As Ambasada Amerikane nuk ka bërë ndonjë njoftim zyrtar për këtë vizitë.

Interesant është edhe fakti se, Guilfoyle, e cila në Athinë njihet shpesh si “zonja e hekurt e diplomacisë amerikane”, nuk është shoqëruar dhe as pritur nga personeli i ambasadës amerikane në Tiranë, një rrethanë kjo që e bën edhe më enigmatik këtë takim të zhvilluar larg syrit të publikut.