AktualitetBote

VIDEO: Italia nën ujë, Spanja e pushtuar nga zjarret! Gjendje alarmi në Europë

Qindra zjarrfikës dhe ushtarakë po luftojnë me flakët që kanë zhuritur 7,500 hektarë tokë në jugperëndim të Spanjës dhe kanë detyruar evakuimin e mbi 500 personave.

Zjarri më i madh dhe më i vështirë, ai në veri të Extremadurës po ushqehet nga erërat e forta në zonë, sipas autoriteteve lokale, të cilat thonë se bëhet fjalë për zjarrvënie të qëllimshme.

Tre rrugë kryesore janë mbyllur ndërsa në dispozicionin të ekipeve zjarrfikësve dhe anëtarëve të njësisë ushtarake të emergjencave që po i asistojnë, janë vënë 10 mjete tokësore, gjashtë avionë cisterne e tetë helikopterë.

- Publicitet -

“Problemi nuk janë burimet njerëzore dhe materiale”, tha kreu rajonal i Extremadurës, Guillermo Fernández Vara. “Problemi është era e fortë që po e bën jashtëzakonisht të vështirë vënien e flakëve nën kontroll”, shtoi ai.

Fernández Vara u shpreh se kushdo që e kishte ndezur zjarrin e dinte se çfarë po bënte. “Pishat janë si shishe me benzinë këtu, dhe bohcet e tyre janë si flakëhedhëse”, shtoi ai.

Kryeministri spanjoll Pedro Sanchez u detyrua të anullonte nëj tubim elektoral të parashikuar në rajon përpara zgjedhjeve lokale të javës së ardhshme.

Sánchez tha se po ndiqte nga afër situatën dhe u ofroi personave të prekur prej mbështetjen e tij të plotë.

Sipas Sistemit Europian të Informacionit për Zjarret pyjore, më shumë se 315,000 hektarë tokë në Spanjë u shkrumbuan nga flakët vitin e kaluar.

Ndërkohë, përmbytjet vdekjeprurëse që kanë përfshirë rajonin verior italian të Emilia Romagna, duke vrarë të paktën 14 persona, sipas studiuesve janë një tjetër shenjë e përshpejtimit të krizës klimatike.

Përmbytjet vijnë pas disa viteve të thatësirës së madhe në rajon, e cila ka ngjeshur tokën, duke ulur aftësinë e saj për të thithur reshjet.

“Rritja e temperaturave intensifikon episodet e thatësirës, ​​tharjen e tokës dhe ndryshimin e përshkueshmërisë së saj në mënyra të ndryshme”, tha Mauro Rossi, një studiues në Institutin Kërkimor për Mbrojtjen Gjeo-Hidrologjike, pjesë e Këshillit Kombëtar të Kërkimeve Italiane.

Sasitë ekstreme të ujit që bien gjatë një periudhe të shkurtër kohore përkeqësojnë rrjedhjen, shtoi Rossi, duke bërë që uji i tepërt të derdhet drejt lumenjve, të cilët përgjigjen duke mbushur, gërmuar dhe ndryshuar shtretërit.

Më shumë se 20 lumenj në rajon kanë dalë nga shtrati, duke shkaktuar një valë prej 280 rrëshqitjesh dheu. Deri më tani 25 mijë njerëz janë detyruar të largohen nga shtëpitë e tyre dhe rreth 27 mijë kanë mbetur pa energji elektrike.

Përmbytjet kanë shkatërruar edhe tokat bujqësore. Sipas një shoqatë fermerësh, më shumë se 5 mijë të tilla ishin nën ujë në Emilia Romagna, e cila mbetet një zonë e njohur si “Lugina e frutave” si dhe fusha me misër dhe drithëra. Serat dhe stallat gjithashtu janë përmbytur, ku në raportime thuhet se ka kafshë të mbytura.

j.l./ dita

Shpërndaje këtë artikull