Nga Adrian Thano
Botuar në DITA
Brezi i ri ndoshta nuk e di që jo shumë kohë më parë, Tirana ishte qyteti i baltës dhe i kioskave. Kaosi urban të krijonte përshtypjen se gjithçka po shkonte keq.
Sot, Tirana ka ende probleme, por të mbush me dëshirë për të jetuar. Qyteti ka ngjyra, ka jetë, po bëhet më i gjerë, më i lartë, më i bukur, më joshës.
Të menaxhosh një qytet të madh është e vështirë. Por ta menaxhosh në kushtet e ndryshimit së jashtëzakonshëm të numrit të banorëve, të harmonizosh interesa dhe nevoja të një fluksi që rritet në mënyrë marramendëse përditë, kjo nuk është një punë e lehtë.
Si e tillë, meriton të mbështetet dhe të lëvdohet. Bashkia e Tiranës, kryebashkiaku Veliaj dhe stafi i tij, kanë të gjitha arsyet e botës, të ndihen krenarë.
Ndryshimin e ndjejnë ata që jetojnë në Tiranë, por e theksojnë më fort ata që vijnë nga jashtë kryeqytetit. Herët a vonë e pranojnë edhe më skeptikët: Tirana jonë, Tirana e të gjithëve është bërë shumë më e bukur, shumë më e jetueshme.
Të hedhësh baltë mbi Tiranën, të hedhësh baltë mbi Shqipërinë, të ankohesh për çdo gjë “shqiptare”, për fat të keq, sot është bërë si virusi; një ‘epidemi’ që na ka prekur në masë.
Por kujdes! Askush nga ne, nuk po jeton më mirë nga ajri toksik që përhapim pa u menduar dy herë, rreth vetes.
Mirë apo keq, ky është vendi ynë. Të gjithë bëjmë zgjedhjet tona në jetë, por nëse kemi nxënë diçka në këta 30 vite arrati të detyruar, ky është mësimi: Askund nuk është fushë me lule. Veçanërisht për ne shqiptarët.
Për ata që duan të ikin, për ata të rinj që duan të nisin një jetë të re, Tirana është sot një opsion dinjitoz.
Videoja e mëposhtme, jep një pamje reale të Tiranës së këtyre kohëve, që me shumë gjasa do mbetet në histori si “Tirana e lalit”.
E regjistruar me zërin e vetë kryebashkiakut në sfond, ajo është vërtetë e arrirë. Nuk ka brenda politikë banale, as retorikë konflikti. Fragmenti fluturues me “avazin” në kal, është një metaforë e qartë dhe e goditur. Pjesa me ndarjen e banorëve dhe lagjeve, sipas krahinave, ta mbush zemrën full.
Është plot jetë dhe ngjyra. Fiks si Tirana. Mos e humbni:
