Policia e Maqedonisë së Veriut ka zbuluar një tunel 40 metërsh që ishte përgatitur mbi 6 muaj për arratisjen e të burgosurve nga burgu më i madh i Maqedonisë së Veriut, ai i Idrizovës. Siç ka njoftuar Ministria e Punëve të Brendshme, tuneli do të shërbente si biletë për arratisjen e 8 të burgosurve që ishin të dënuar me mbi 10 vite burg apo burg të përjetshëm.
“Tuneli ka qenë në thellësi prej 1 metër, në diametër prej rreth 80 centimetrave, i cili ka qenë i siguruar me trarë dhe tulla. Në tunel janë gjetur disa shporta plastike, të cilat janë të lidhura me litarë, e me të cilat është larguar dheu i gërmuar. Gjithashtu ka pasur edhe një kabllo elektrike me poç, e cila ka shërbyer për ndriçim të tunelit”, tha Toni Angellovski, zëdhënës i policisë.
Gërmimi i tunelit ishte organizuar në mënyrë të përpiktë. Të burgosurit kanë punuar në turne për të gërmuar. Qeveria maqedonase ka shkarkuar drejtorin e burgut të Idrizovës, Shpend Tahiri, dhe në vend të tij si ushtrues detyre ka emëruar gjeneral-majorin e policisë Zoran Jovanovski.
m.b./dita
