Momentet e fundit të blogerit rus Vladlen Tatarsky, i cili u vra në Shën Petersburg të dielën e kaluar, janë kapur nga pamjet nga brenda lokalit ku ndodhi shpërthimi.
Në videot që po bëjnë xhiron e internetit, shohim blogerin ushtarak, i cili ka qenë një mbështetës i flaktë i pushtimit rus të Ukrainës duke nxjerrë dhuratën nga kutia.
Pak çaste më vonë, teksa e vendos përsëri bustin në kuti ndodh një shpërthim që e vret atë dhe plagos dhjetëra të tjerë.
Siç është bërë e ditur tashmë, busti në fjalë përmbante lëndë shpërthyese dhe ishte sjellë në lokal nga Daria Trepova, e reja e arrestuar dje, e cila në disa klipe është vënë re duke ngritur duart para trupit, sikur po mbrohej nga diçka dhe më pas i afronte ato në fytyrë.
Komiteti hetues rus njoftoi dje se Trepova u arrestua nën dyshimin për vrasjen e Tatarsky.
Tatarsky, emri i vërtetë i të cilit ishte Maxim Fomin, kishte më shumë se 560,000 ndjekës në Telegram dhe ishte një nga blogerët më të shquar që mbronte pushtimin rus të Ukrainës, megjithëse shpesh fajësonte zyrtarë të lartë ushtarakë rusë për humbjet.
j.l./ dita
