Vidhte nëpër farmacitë e kryeqytetit, vihet në pranga 37-vjeçari.
Nëpërmjet operacionit të koduar “Tracing”, për goditjen e veprimtarisë kriminale në fushën e vjedhjes së pronës dhe pasurisë, policia e Tiranës ka zbardhur 3 rastet e vjedhjes së farmacive të kryera nga i arrestuari gjatë muajve të fundit, ndërkohë që dyshohet të jetë edhe autor i disa vjedhjeve të tjera.
“Si rezultat i këtij operacioni u vu në pranga shtetasi E. B., 37 vjeç, banues në Tiranë, për veprën penale “Vjedhja”. Nga veprimet hetimore ka rezultuar se ky shtetas ka kryer disa vjedhje, gjatë muajve të fundit, në disa farmaci në Tiranë. 3 prej këtyre vjedhjeve janë dokumentuar me prova ligjore, konkretisht: Më datë 31.01.2023 dhe më datë 19.03.2023, ka vjedhur shuma të ndryshme parash, në një farmaci, në rrugën “Teodor Keko”, ndërsa në datën 23.04.2023, ka vjedhur një shumë parash, në një farmaci, në rrugën “Loni Ligori””, bën me dije policia.
Në cilësinë e provës materiale u sekuestruan veshje të cilat dyshohet se autori i ka përdorur gjatë kryerjes së vjedhjeve.
Autoritetet e policisë bëjnë me dije se po vijon puna për dokumentimin e vjedhjeve të tjera që mund të jenë kryer nga ky shtetas. Materialet procedurale i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.
p.k\dita
