Ditën e sotme pritet të shpallet studioja arkitekturore fituese e Konkursit Ndërkombëtar të Dizajnit për krijimin e “Qendrës Multifunksionale dhe Stacioneve të Informacionit” të Parkut Kombëtar të Lumit Vjosa.
Kryeministri Edi Rama në fjalën e tij gjatë prezantimit të tre ideve finaliste të Konkursit Ndërkombëtar të Qendrës Multifunksionale dhe Stacioneve të Informimit për Parkun Kombëtar të Vjosës, tha se ky është vendimi më i guximshëm që mund të merrte ndonjëherë një qeveri.
Një mesazh e pati edhe për Bashkimin Europian, për të cilin tha se ndërsa i jepnin leksione Shqipërisë se Vjosa duhej shpallur Park Kombëtar, duhet të kujtojnë se edhe lumenjtë në BE kanë qenë të egër, por i kanë zbutur për aryse që s’kanë lidhje me mbrojtjen e mjedisit.
“Me konkursin ndërkombëtar për Qendrën Multifunksionale dhe Stacioneve të Informimit për Parkun Kombëtar të Vjosës po hyjmë në një fazë të re, atë të konservimit dhe zhvillimit të këtij parku të jashtëzakonshëm kombëtar. Nuk ka asnjë vend në Europë të paktën, se bota është shumë e madhe për të folur me siguri, që të ketë një park kombëtar që përshkon të gjithë trupin e vendit. Nuk ka asnjë vend në Europë sot që të ketë një lumë të egër, gjë për të cilën shpeshherë kemi qenë të detyruar t’u kujtojmë miqve europiane, kur këmbëngulej se duhej ruajtur lumi i fundit i egër në Europë, por më parë se sa na japin në leksione se si ruhet një lumë i egër, duhet të kujtohen që të egër kanë qenë edhe lumenjtë e tjerë të Europës, por ata i kanë zbutur për qëllime që s’kanë pasur të bëjnë me mbrojtjen e natyrës. jemi mirënjohës për nxitjen, inkurajimin”, tha Rama.
Kreu i qeverisë theksoi se asnjëherë nuk kanë qenë skeptik për shpalljen e Vjosës Park Kombëtar. “Nuk kemi qenë hezitues për ta shpallur Vjosën Park kombëtar, ka qenë pjesë e vizionit”, tha Rama.
p.k\dita
