Gjykata e Elbasanit i del kundër Prokurorisë dhe e rrëzon për herë të dytë kërkesën që deputeti demokrat Gazment Bardhi të thirret për të dëshmuar në procesin për masakrën e 21 prillit 2021, katër ditë para zgjedhjeve të përgjithshme, kur u vranë zyrtari vendor socialist Pjerin Xhuvani dhe u plagosën 4 persona të tjerë; dhëndri i viktimës, një efektive policie dhe 2 ish-policë që bënin truprojat e shtabit demokrat për zgjedhje.
Për shkak të konfuzionit të krijuar, Gjykata pasi rrëzoi kërkesën e akuzës, e shtyu seancën për javën e ardhshme. Në këtë gjyq po dëgjohen rreth 60 dëshmitarë të listës së Prokurorisë, për krimin që akuzohet se ka kryer ish-speciali i RENEA-s, i pandehuri Arbër Paplekaj, njëkohësisht edhe pjesë e shtabit të PD-së për mbrojtjen e votave.
Mësohet se në seancë kanë munguar edhe 10 dëshmitarët të cilët janë thirrur për të dëshmuar mbi ngjarjen. Këta të fundit do të thirren sërish për të dëshmuar në seancën e 11 prillit dhe në rast se do të mungojnë, ndaj tyre do ketë dispozita ligjore.
Prokuroria u shpreh se Bardhi duhet të vijë pasi ka qenë kreu i shtabit demokrat për qarkun e Elbasanit dhe ka dijeni për rrethanat e ngjarjes, por Gjykata argumentoi se Bardhi duhej të ishte marrë në pyetje më parë dhe jo tashmë në këtë pikë të hetimit, ku nuk është përfshirë në dosje.
Pjerin Xhuvani mbeti i vrarë në Elbasan pasi u qëllua me armë nga Arbër Paplekaj, shoqëruesi i kreut të listës së Partisë Demokratike, Gazment Bardhi. Nga ngjarja e 21 prillit, të plagosur mbetën edhe katër persona të tjerë; Emiljan Prenga dhe Pavlo Vuksani, ish-oficerë policie, Eltjon Bodinaku, dhëndri i Xhuvanit dhe Xhensila Sota, punonjëse e policisë në detyrë.
Paplekaj pranoi krimin dhe u vetëdorëzua në Repartin e Forcave RENEA në Tiranë, duke thënë se qëlloi për vetëmbrojtje, pasi u sulmua më parë nga persona që sipas tij po blinin vota në favor të PS-së. Ngjarja zbuloi edhe skandalin e PD-së për ngritjen e një grupi të armatosur, të vetëshpallur Struktura për Mbrojtjen e Votës, ku një pjesë e mirë e anëtarëve të së cilës rezultuan persona të njohur edhe për strukturat ligjzbatuese në vend.
