Interpol Tirana solli në pranga nga Franca drejt Shqipërisë, një të shumëkërkuar të dënuar me 25 vjet burgim, për vrasje me paramendim të Vasil Bibës, një biznesmeni ndërtimesh, për shkak se nuk i ktheu borxhin që i kishte marrë.
Policia e Shtetit bëri me dije se ekstradoi 43-vjeçarin Bledar Mneri, i cili rezulton i dënuar me 25 vite burgim në mungesë nga Gjykata e Tiranës, për veprat penale “vrasja me paramendim” dhe “mbajtja pa leje dhe prodhimi i armëve shpërthyese dhe i municionit”.
Krimi ka ndodhur në vitin 2015, në fshatin Priskë të Tiranës, ku Mneri pasi rrëmbeu, ekzekutoi me armë dhe më pas groposi trupin e ndërtuesit Biba, për shkak të mosmarrëveshjeve ekonomike.
Ngjarja ka ndodhur në nëntor të vitit 2015, ndërsa viktima u gjet në Priskë, i groposur në një zonë të pyllëzuar. Vendimi i Gjykatës së Tiranës për vrasjen e bujshme është dhënë më 12 tetor 2017, teksa autori i identifikuar ishte në arrati dhe derisa u kap në Francë pak kohë më parë.
Bledar Mneri në vitin 2015 ka mbajtur peng biznesmenin e ndërtimit Vasil Biba, pasi i kishte dhënë 25 mijë euro për një dyqan që nuk e mori kurrë. Pasi e mbajti disa ditë peng, e vrau dhe trupin e groposi në Priskë të Tiranës.
Pas vrasjes, i pandehuri u largua në Gjermani, ku kërkoi edhe azil politik dhe më pas kaloi në Francë me të njëjtën strategji, por pa sukses.
Hetimet për gjetjen e autorit të vrasjes së biznesmenit ishin të vështira, pasi kishte marrë shumë kërcënime nga persona të ndryshëm, të cilëve u kishte marrë para borxh dhe nuk ua kishte kthyer.
Policia bën me dije se pas ekstradimit në Rinas, shtetasi Bledar Mneri iu dorëzua Drejtorisë së Përgjithshme të Burgjeve, për ekzekutimin e vendimin të Gjykatës.
