Presidenti i Serbisë, Aleksandër Vuçiç, ka deklaruar se janë zbuluar eksplozivë pranë një tubacioni kryesor gazi që furnizon vendin dhe shtrihet drejt Hungarisë.
Sipas Vuçiç, policia dhe ushtria serbe kanë gjetur “eksplozivë me fuqi shkatërruese” pranë kësaj infrastrukture jetike, në një zonë afër qytetit Kanjiza, rreth 10 kilometra nga kufiri me Hungarinë.
Ai tha se eksplozivi ishte gjetur në dy çanta shpine, disa qindra metra larg tubacionit të gazit Balkan Stream, dhe mund të kishte shkaktuar dëme të mëdha në furnizimin me gaz të Serbisë dhe Hungarisë, si dhe rrezik për jetën e një numri të madh njerëzish.
Ai bëri të ditur se ka informuar kryeministrin hungarez Viktor Orban mbi rezultatet e para të hetimeve lidhur me kërcënimin ndaj tubacionit që lidh dy vendet.
Sipas presidentit serb, pranë eksplozivëve janë gjetur edhe fitila, ndërsa deri më tani nuk raportohet për dëme.
“Ushtria serbe arriti të parandalojë një veprim kundër interesave jetike të vendit”, tha Vuçiç, duke paralajmëruar se Serbia do të reagojë ashpër ndaj çdo kërcënimi ndaj infrastrukturës kritike.
Kryeministri Orban konfirmoi më vonë informacionin, duke theksuar se autoritetet serbe kishin gjetur eksplozivë dhe pajisjet e nevojshme për aktivizimin e tyre.
Vuçiç shtoi se hetimi është në vazhdim dhe se agjencitë e inteligjencës së Serbisë po punojnë për të identifikuar grupin përgjegjës, i cili kishte si qëllim të dërgonte një mesazh politik. Ai paralajmëroi se cilido i kapur do të ndëshkohet rëndë.
Autoritetet serbe, përfshirë policinë dhe ushtrinë, po kontrollojnë zonën në komunën e Kanjizhës, rreth 15 kilometra nga kufiri me Hungarinë. Kontrolli kryhet me tokë dhe ajër, duke përdorur helikopterë, dronë, qen nuhatës, pajisje termike dhe ekipe kundërsabotimi.
Që më 19 mars, siguria është rritur edhe në stacionin e kompresorëve në Zhabar, pjesë e tubacionit Balkan Stream, për shkak të situatës së tensionuar në Lindjen e Mesme dhe nevojës për ruajtje të gazsjellësit rus që furnizon Hungarinë.
Ngjarja vjen në një moment të ndjeshëm politik, vetëm një javë para zgjedhjeve në Hungari, të cilat do të përcaktojnë nëse Orban do të zgjasë më tej pushtetin e tij.
j.l./ dita
