Protestat masive qytetare që kanë përfshirë Tiranën kanë shënuar për herë të parë publikimin e një strukture drejtuese. Një ditë pas dërgimit të një platforme me pesë kërkesa drejtuar qeverisë dhe përfaqësive diplomatike perëndimore, vëmendja është zhvendosur te emrat në fund të dokumentit, të cilët kanë firmosur si “Grupi Koordinues” i lëvizjes.
Pesë kërkesat i ka lexuar më herët publikisht edhe Dritan Goxhaj, i cili u sulmua menjëherë ashpër nga qeveria dhe mediat afër saj. Por emri i Goxhajt nuk gjendet mes 13 emrave në listën e publikuar sot të firmosësve.
Harta e emrave zbulon një miksim interesant të shoqërisë civile: nga arkitektë e inxhinierë, deri te zërat e diasporës dhe rezistencës lokale.
Më poshtë, profilet e personave që kanë marrë përsipër të jenë zëri i sheshit përpara institucioneve dhe ndërkombëtarëve:
Entela Koja: Arkitekte dhe urbaniste me studio konsulence, e njohur në betejat publike për planifikimin urban, mjedisin dhe mbrojtjen e të drejtave të pronës.
Arben Kola: Një nga figurat më të dallueshme të protestave. Guidë turistike prej më shumë se një dekade, i identifikuar gjithmonë në shesh me plisin karakteristik dhe altoparlantin në dorë.
Luçjana Kokaj: Simbol i rezistencës lokale mjedisore. Ajo udhëhoqi protestat e banorëve të Rrjollit kundër ndërtimit të resorteve në bregdet, duke shtrirë aktivizmin e saj edhe në mbrojtjen e zonës së mbrojtur të Zvërnecit.
Gentjan Progni: Inxhinier informatik dhe ekspert IT. Është bërë i njohur për publikun përmes denoncimeve të forta për sigurinë kibernetike, rrjedhjen e të dhënave shtetërore dhe menaxhon platformën “Transparenca”, e cila monitoron fshirjen ose ndryshimin e lajmeve në mediat online.
Edviol Kulluri: Shkrimtar, sipërmarrës dhe themelues i organizatës “The Leading Organization”. Ai është një nga ideatorët dhe orientuesit kryesorë të protestës, duke promovuar në rrjetet sociale platformën e tij “Doktrina e Forcës dhe Mirësisë”.
Etleva Merko: Mësuese me karrierë të gjatë në arsimin publik e privat. Më parë ka mbajtur postin e nënkryetares në lëvizjen “Shqipëria Bëhet”, nga ku dha dorëheqjen për të vijuar si aktiviste e pavarur qytetare.
Ilir Xhemalaj: Kryetar dhe themelues i Sindikatës Kombëtare të Operatorëve Telefonikë (SKOT), i cili sjell në grup përvojën e gjatë të organizimeve sindikale për të drejtat e punonjësve.
Mevlan Mata: Përfaqësues i organizuar i diasporës në SHBA. Pjesë e nismës “Diaspora për Shqipërinë e Lirë”, ai ka deklaruar se ka udhëtuar nga Amerika posaçërisht për t’u bërë pjesë aktive e koordinimit të sheshit.
Everest Bardhi: Vetëm 19 vjeç, me origjinë nga Mirdita. Ai u kthye në një nga zërat më emocionalë të lëvizjes pasi ndau publikisht historinë e babait të tij, ish-infermier në Urgjencën e Tiranës.
Përparim Gjeka: Sipërmarrës dhe ekspert në fushën e logjistikës dhe tregtisë ndërkombëtare, me aktivitet të shtrirë midis Europës dhe Kinës.
Marjen Rama: Sipërmarrës në sektorin e turizmit dhe udhëtimeve, i angazhuar prej vitesh në industrinë private.
Megan Balaj & Gjon Ndoj: Dy emra më pak të njohur për jetën publike deri më sot, por që kanë marrë rol kyç brenda bërthamës organizative të këtij grupi.
Dalja publike me emra dhe mbiemra formon për herë të parë një adresë për dialog ose përballje.
Mbetet për t’u parë nëse ky “Grup Koordinues” do të arrijë të ruajë unitetin e sheshit, apo do nxisë përçarje mes grupimeve të tjera qytetare që ende nuk ndihen të përfaqësuara nga kjo listë e 13 firmëtarëve.
o.p. / dita
