Ish-inspektori i Agjencisë së Trajtimit të Pronave, Ilir Kapetani, i arrestuar për korrupsion do vazhdojë të qëndrojë në qeli, por Prokuroria ka siguruar prova që i cilëson me rëndësi, ku përveç dokumenteve, ka edhe përgjime.
Edhe pse në seancën e sotme në Gjykatën e Posaçme kundër Korrupsionit dhe Krimit të Organizuar, Kapetani mohoi akuzat, SPAK nguli këmbë se ka prova se i akuzuar është përfshirë në 14 episode korruptive, me trashëgimtarë të ish-pronarëve, duke iu marrë shuma parash në shkëmbim të premtimit për të siguruar kompensimin financiar, gjatë trajtimit të kërkesave të tyre për kthimin dhe kompensimin. Në dosjen hetimore janë edhe përgjimet telefonike, shfaqet Kapetani komunikon më një qytetar me tone të ashpra, duke e kërcënuar dhe i kërkuar që të mos komunikojë me asnjë për paratë.
“Po shkrove kështu nëpër mesazhe jo lekët, jo stërlekët, do të të thyej celularin edhe hundën, dakort? Kaq po të them edhe një herë … Të kam porositur njëqind herë, mos komuniko fare, as lekë as … Do të të takoj unë ty sot, mirë? Edhe të shohësh ti estradë pastaj, hajt mirupafshim…,”-dëgjohet teksa thotë Ilir Kapetani.
Sipas dosjes hetimore, teksa qytetarët ishin në pritje të marrjes së pronës së tyre kuptuam se ishin mashtruar nga ish-inspektori Ilir Kapetani ndaj i shkruanin dhe e telefononin me qëllim kthimin e shumave që kishin dhënë. Pagesat ndaj tij varionin nga 150 mijë deri në 3 milion lekë. Në gjyq dolën dhe 8 persona të tjerë, qytetarë të cilët kishin kontaktuar me Kapetanin për çështje të pronave, nga të cilët 6 prej tyre u lanë në “arrest shtëpie”, ndërsa 2 të tjerë me “detyrim paraqitje”.
