Kryeministri i Sllovakisë , Robert Fico , i cili mbeti i plagosur rëndë nga një sulm ndaj tij, ka publikuar të shtunën një foto ku shfaqet në spital duke votuar në kuadër të zgjedhjeve evropiane.
“Unë votova në spital”, tha Fico në llogarinë e tij në Facebook, duke postuar një foto të tij në këmbë, i mbështetur në një paterica, duke hedhur votën e tij në një kuti votimi të vendosur në një dhomë spitali.
“Duhet të zgjidhen anëtarët e Parlamentit Evropian, të cilët do të mbështesin iniciativat për paqen dhe jo vazhdimin e luftës”, theksoi Fitso.
Pak më vonë ai shfrytëzoi rastin për të akuzuar edhe një herë Perëndimin për nxitje të tensioneve me Rusinë. Fico, një mbështetës i Putinit dhe armiqësor ndaj ndihmës ushtarake për Kievin, u plagos nga katër plumba më 15 maj teksa përshëndeti mbështetësit e tij pas një takimi të qeverisë në qytetin Hadlova.
Kreu i qeverisë sllovake shfrytëzoi rastin për të kritikuar pëlqimin e vendeve perëndimore, që lejuan Ukrainën të përdorte armë perëndimore për të sulmuar objektivat në territorin rus. Sipas tij, kjo është prova se demokracitë kryesore perëndimore nuk duan paqen, por përshkallëzimin e tensioneve me Federatën Ruse, e cila është e sigurt që do të ndodhë.
Fico përsëriti premtimin e tij të mos e çojë Sllovakinë në aventura të tilla ushtarake.
Sllovakia po zgjedh 15 eurodeputetë nga gjithsej 720 anëtarë të Parlamentit Evropian, mes një shtytjeje të pritshme nga e djathta nacionaliste dhe një atmosfere të tensionuar që nga lufta në Ukrainë.
j.l./ dita
