Dëshmitë e njëjta për zhdukjen misterioze të dy shoqeve në vitin 2004 dhe që besohet se janë ekzekutuar dhe groposur në bregdetin e Divjakës nga autori që tashmë nuk jeton më dhe ushtarët e tij, kanë bërë që Prokuroria e Tiranës të hapë një hetim të zgjeruar, me qëllim zbardhjen e plotë të ngjarjes makabre dhe të paktën zbulimin e trupave të viktimave, që familjarët të kenë një varr ku edhe t’i qajnë të dashurit e tyre. Bëhet fjalë për Nertila Osmanin dhe Sonila Kryeziun, që jetonin dhe punonin në Tiranë në kohën e krimit, teksa njëra prej tyre ishte e martuar me një personazh të fortë të asaj kohe, Arben Hoxha, i cilësuar si kreu i një grupi në Lushnjë dhe i vrarë një vit pas zhdukjes së dy shoqeve.
Drejtuesi i organit të akuzës në kryeqytet, Arens Çela, ka konfirmuar lajmin pas interesimit të emisionit “Pa Gjurmë”, që raportoi edhe dëshmitë e dy grave që kishin dijeni për autorët dhe rrethanat. Në këtë dokument, Prokuroria sqaron se më 2004, periudhë kur u zhdukën 2 shoqet është hetuar vetëm për “rrëmbim personi” dhe atë kohe u mbyll çështja për shkak të mungesës së provave. E ndërsa pas publikimit të rastit, janë rihapur hetimet.
Në vitin 2005, një vit pas zhdukjes së 2 vajzave, janë gjetur 2 trupa të pajetë dhe sot në varrezat e Divjakës ekzistojnë edhe dy varre pa emër. Nuk dihet nëse këto dy varre i përkasin 2 shoqeve. “Fjalën e fundit” do e thonë institucionet, pasi të bëhen krahasimet dhe ndoshta analizat e ADN-së pas zhvarrosjes së mundshme. “Do duhet të bëhet zhvarrosja dhe të merren analizat e AND e të bëhen krahasimi me familjarët, për të kuptuar nëse bëhet fjalë për Nertila Osmani dhe Sonila Kryeziu”, thanë burimet. Në krim besohet se kanë marrë pjesë të paktën 5 persona. Autori i ekzekutimit që besohet se ka ndodhur në një hotel në Lushnjë është pikërisht Arben Hoxha, teksa më tej trupat janë transportuar dhe groposur në dunat e Divjakës, pranë kabinave të plazhit, po për shkak të erozionit dhe baticë-zbaticave të detit, mund të ketë ndryshime të forta gjeografike. Katër persona të tjerë kanë shërbyer si ndihmësa, nga të cilët mësohet se dy nuk jetojnë më. Dy të mbeturit kanë dijeni se ku janë groposur trupat dhe mund të ndihmojnë hetuesit. Arben Hoxha ishte bashkëshorti i Nertila Osmanit dhe kishte një vajzë vetëm një vjeçe në kohën e ngjarjes. Për shkak të konflikteve dyshohet se Nertila kërkonte të largohej dhe shoqja e saj duket se e ka ndihmuar. Por Hoxha i ka gjetur dhe në grindje e sipër i ka ekzekutuar dhe fshehur kufomat. Dëshmitë e reja, sikurse edhe ajo e djeshmja nga Anglia nga një tjetër grua që kishte dijeni, por s’u identifikua, përforcojnë faktin se dy shoqet janë vrarë e groposur në vitin 2004.
