Parajsa për Ambasadorin e Holandës, Reinout Vos është “Mali Tomor”. Diplomati i lartë me bashkëshorten i tij Corien ishin këtë fundjavë në qytetin e Beratit, të ftuar nga kryetari i bashkisë Ervin Demo për Festivalin “Wine and Stories of Berat”.
Festivali u mbajt nga data 21-23 tetor dhe përfshiu aktivitete kulinare dhe muzikore. Për herë të parë kantinat më të mira nga Berati dhe nga krahina të tjera të Shqipërisë dhe Kosovës servirën verat e tyre për turistët e shumtë vendas dhe të huaj.
Çifti, i cili e dashuron natyrën e bukur shqiptare zgjodhi të vizitonte malin e famshëm të Tomorit me skuadrën e Albania Rafting Group duke bërë rreth 5 orë hiking mes pyjeve me lisa, haje dhe pisha, të cilat në këtë periudhë kanë marë ngjyrë të artë dhe kanë shtruar qilim gjethesh me ngjyra vjeshte, të atilla sa duket sikur vallëzon ndërsa ecën.
Ata u mahnitën me pamjen spektakolare, aromën e luleve, gjetheve, tokës dhe tingullin e këmborëve të dhive e lopëve që kullosnin në lëndinat e Tomorit.
Pasi vizituan rrënojat e kalasë pellazgjike të Tomorit dhe pamjen spektakolare 360 grade që të ofron ajo, udhëtimin e tyre e bënë edhe më të bukur takimi me banorët e zonës si Niku i cili me mushkën e tij na shoqëroi gjithë udhëtimin; drekën e ofroi Baftjari dhe bashkëshortja e tij Lela, te cilët pas 25 vitesh emigrim në Greqi janë rikthyer në fshatin e tyre të lindjes Qafë Dardhë, ku shërbejnë ushqimin e fshatit dhe e kanë kthyer shtëpinë e tyre në guest-house e parë ne fshat.
Në fund të udhëtimit ambasadori Vos u shpreh se Mali i Tomorit është “parajsë” dhe se duhet të jemi shumë të kujdesshëm për ta mbrojtur atë.
“Nuk është hera e parë që ambasadori holandez ishte me skuadrën tonë pasi ne muajin shtator ai bëri rafting në ujrat e rrëmbyeshëm dhe të kristaltë të Vjosës në Përmet. Si një natyrë dashes ai shumë shpejt do na bashkohet në udhëtime të tjera si rafting në kanionet e Osumit, kayaking dhe snowshoeing“, – thuhet në një njoftim të Albania Rafting Group.
i.b. / dita
