Gjykata e Tiranës ka caktuar masën e sigurisë “detyrim paraqitje” për Rei Bitrin, 21-vjeçarin që aksidentoi një punonjës policie në orët e para të mëngjesit të së enjtes në rrugën “Xhanfize Keko”.
Gjatë seancës gjyqësore, i riu ka pretenduar se polici i ka dalë përpara papritur dhe nuk e kishte parë në kohë. Sipas Prokurorisë së Tiranës, efektivi i policisë ka pësuar dëmtime të lehta dhe ndodhet jashtë rrezikut për jetën. Rezultatet e ekspertizës mjekësore priten për të sqaruar plotësisht gjendjen e tij.
Prokuroria ka marrë dëshmitë e dy efektivëve të tjerë të policisë që ishin në shërbim në momentin e aksidentit. Sipas tyre, Rei Bitri ishte duke udhëtuar me mjetin e tij privat kur efektivi e kishte urdhëruar të hapte krahun. Pikërisht në atë moment ka ndodhur përplasja, e cila i shkaktoi dëmtime në këmbë punonjësit të policisë.
Policia po vijon hetimet për zbardhjen e plotë të ngjarjes.
j.l./ dita
