Islanda është tronditur nga një seri tërmetesh relativisht të lehtë, por që kanë rritur ndjeshëm frikën për shpërthimin e mundshëm të një vullkani. Si masë paraprake, autoritetet kanë urdhëruar me mijëra persona të evakuohen nga qyteti jugperëndimor i Grindavik si masë paraprake.
Zyra e Meteorologjisë Islandeze ka thënë së fundmi se sasi të mëdha magme janë duke qarkulluar nën tokë dhe ekziston frika se ato mund të shkaktojnë aktivizimin e vullkanit. Që nga fundi i tetorit janë regjistruar më shumë se 20 mijë lëkundje tërmeti në zonën pranë vullkanit Fagradalsfjall, i cili u riaktivizua në vitin 2021 pasi kishte rreth 800 vjet jo aktiv. Të gjitha rrugët që të çojnë në qytezën me rreth 4 mijë banorë tashmë janë mbyllur, përveç rasteve urgjente, në mënyrë që në rast të një evakuimi të menjëhershëm të mos krijohet bllokim.
Zyra e Meteorologjisë Islandeze tha në një deklaratë të premten se kanë ndodhur ndryshime të rëndësishme në aktivitetin vullkanit. “Lava është e vendosur nën qytet dhe ende nuk mund të përcaktohet koha dhe vendi ku ajo mund të shpërthejë. Sasia e magmës është shumë më e madhe se ajo që lidhet me shpërthimet në Fagradalsfjall”, tha Zyra e Meteorologjisë Islandeze. Islanda është një nga zonat më aktive në botë, me rreth 30 zona vullkanike aktive.
p.c. / dita
