“Albanologët rusë do mungojnë”, nis nesër Seminari Ndërkombëtar për Gjuhën, Letërsinë dhe Kulturën Shqiptare

Seminari Ndërkombëtar për Gjuhën, Letërsinë dhe Kulturën Shqiptare do mbajë këtë vit edicionin e tij të 40-të. Ky aktivitet që mbahet nga 15 deri 20 gusht, këtë vit pritet të ketë rreth 150 pjesëmarrës nga shtete të ndryshme të botës. Në aktivitet do ketë seminaristë që vijnë nga Gjermania, nga Polonia, Çekia, Bullgaria, Turqia, Greqia, Serbia, Italia, Holanda etj.

Në një intervistë për Radion Evropa e Lirë, drejtori i seminarit, Shkumbin Munishi thotë se “programi këtë vit është mjaft i ngjeshur sepse çdo ditë do të ketë ligjërata nga albanologë, të cilët do të diskutojnë probleme të ndryshme nga fusha e gjuhës, letërsisë, kulturës dhe traditës shqiptare në përgjithësi”.

Ky aktivitet është bërë qendër e studimeve albanologjike për dekada me radhë. Parashikohen probleme për albanologët nga Rusia.

Munishi thotë:

“Sa u përket pjesëmarrësve nga Rusia, këtë vit kemi qenë në një situatë të pazakontë. Ne kemi kërkuar instruksione nga organet tona që të vihemi në dijeni nëse është e lejuar pjesëmarrja e tyre në këtë edicion të seminarit.

Për fat të keq – dhe këtë e konsideroj si gjë që nuk është aspak e duhur – ende nuk kemi marrë një përgjigje zyrtare për këtë punë. Dhe praktikisht, ende nuk u kemi kthyer përgjigje seminaristëve që tradicionalisht kanë ardhur nga Rusia.

Kjo çështje tashmë u mbetet autoriteteve, nuk mund të merremi ne me këtë punë. Kam bërë disa hulumtime, del se vende të ndryshme evropiane në përgjithësi e kanë ndaluar pjesëmarrjen, më mirë të them e kanë suspenduar pjesëmarrjen e shkollarëve dhe studentëve rusë në aktivitetet e ndryshme që mbahen në Europë.

Po, e ritheksoj edhe njëherë është dashur që të kemi një përgjigje institucionale lidhur me këtë çështje. Ne nuk u kemi kthyer përgjigje, që në një farë mënyrë konsiderohet si një lloji refuzimi. Por, nuk ka qenë refuzim ose nuk ka qenë një arsyetim i shprehur në mënyrë zyrtare lidhur me pjesëmarrjen e tyre”.

Seminari është mbajtur tradicionalisht në Prishtinë, por në dy raste në të kaluarën, është mbajtur në Tiranë, kur ka qenë i ndaluar nga pushteti serb.

i.b. / dita