Mbledhja e Përgjithshme e Prokurorëve zgjodhi të premten tre anëtaret e reja të Këshillit të Lartë të Prokurorisë, KLP, prokuroren Antoneta Sevdari me 160 vota, Afërdita Ndoi e cila siguroi 165 vota dhe dhe Eloida Goxhi me 148 vota. Tre prokuroret e zgjedhura do të zëvendësojnë kolegët e tyre, Sokol Stojani, Ledina Riza dhe Zeqir Hoda, të cilëve u përfundon mandati në muajin dhjetor.
Për tre funksionet në KLP garuan nga Prokuroria e Përgjithshme Antoneta Sevdari dhe Kostaq Beluri, nga prokuroritë e Apeleve Afërdita Ndoi dhe Irma Balli, ndërsa nga prokuroritë e shkallëve të para, Edina Kurti dhe Eloida Goxhi.
Prokurorja e Prokurorisë së Përgjithshme, Antoneta Sevdari zgjidhet për herë të dytë si anëtare e KLP-së. Ajo u rikthye në detyrë pas rishqyrtimit të çështjes nga Kolegji i Posaçëm i Apelimit, bazuar në vendimin e dhënë nga Gjykata Europiane e të Drejtave të Njeriut, që e cilësoi jo proporcionale masën e dhënë ndaj saj. Sevdari ka punuar më parë në Prokurorinë e Tiranës.
Prokurorja e Apelit, Afërdita Ndoi mban dhe funksionin e anëtares Këshillit të Emërimeve në Drejtësi për vitin 2026. Më parë ajo e ka ushtruar funksionin në Tiranë dhe në Lezhë, si dhe në ish-Prokurorinë e Apelit Durrës.
Prokurorja e Tiranës, Eloida Goxhi ka qene dhe më pare anëtare e KLP-së. Më parë, ajo ka punuar si prokurore në Durrës dhe Berat, si dhe ka qenë drejtuese e Prokurorisë së Beratit nga viti 2016 deri në vitin 2020.
j.l./ dita
