Një shpërthim i fuqishëm me eksploziv në një automjet mbrëmjen e së shtunës në Gjirokastër i mori jetën 45-vjeçarit Beqir Devolli.
Devolli ndërroi jetë në orët e para të mëngjesit të sotëm, pasi nuk iu mbijetoi plagëve të marra nga shpërthimi me eksploziv i automjetit të llojit ‘Mercedes-Benz’ mbrëmjen e djeshme, pranë godinës së Policisë së Gjirokastrës.
Ai humbi jetën gjatë transportimit për në Spitalin e Traumës në Tiranë, ku po dërgohej për mjekim më të specializuar.
Devolli po drejtonte makinën e tij tip ‘Benz’, ndërsa shoqërohej nga Rigers Mela në momentin e ngjarjes. Viktima, i cili sapo ishte kthyer nga Tirana, ishte edhe shënjestra e atentatit, ndonëse më herët u raportua se objektivi ishte pasagjeri Rigers Mela.
45-vjeçari Devolli njihej edhe me nofkën “Çilo Hunderri.”
Sipas informacioneve paraprake, dyshohet se ai merrej me trafik droge në Greqi, por në policinë e Gjirokastrës nuk rezulton asnjë dosje për të.
Rigers Mela, personi tjetër që ndodhej me të në automjet, ndodhet jashtë rrezikut për jetën. Policia dhe grupi hetimor po vijojnë punën për zbardhjen e plotë të ngjarjes dhe kapjen e autorëve.
Njoftimi i Policisë:
Gjirokastër/Informacion shtesë
Në vijim të informacionit paraprak të dhënë mbrëmjen e djeshme, për shpërthimin e një automjeti tip “Benz” në lëvizje, që dyshohet se është shkaktuar nga lëndë plasëse, me pasojë dëmtimin e drejtuesit dhe pasagjerit, ju informojmë se drejtuesi i automjetit, shtetasi B. D., 45 vjeç, banues në Gjirokastër, ka humbur jetën gjatë transportimit drejt Tiranës.
Pasagjeri, shtetasi E. M., 26 vjeç, banues në Gjirokastër, ndodhet në spital, jashtë rrezikut për jetën. Në informacionin paraprak, ai ishte identifikuar me inicialet R. M. Grupi hetimor vijon punën për dokumentimin ligjor të rastit, identifikimin dhe kapjen e autorit/autorëve.
j.l./ dita
