Një biznesmen i kriptomonedhave ka mbetur i vdekur pasi është qëlluar në një ndër aeroportet më të mëdhaja të Brazilit në një sulm që la të plagosur tre persona të tjerë.
Antonio Vinicius Lopes Gritzbach u vra nga persona të armatosur të paidentifikuar në një makinë të zezë në Aeroportin Ndërkombëtar Guarulhos të Sao Paulos të premten.
Gritzbach kishte marrë kërcënime me vdekje nga Komanda e Parë e Kryeqytetit (FCC) – një grup i fuqishëm kriminal ndërkombëtar.
Biznesmeni kohët e fundit kishte hyrë në një marrëveshje për pranimin e fajësisë me prokurorët vendas për të dhënë informacion mbi lidhjet e tij me FCC, tha policia.
Dy burra që ishin plagosur nga të shtënat u dërguan në një spital aty pranë. E plagosur ka mbetur edhe një grua.
Sekretari i Sigurisë i shtetit të Sao Paulos tha në një deklaratë se vrasja dhe shkaku i saj ishin ende nën hetim.
Mediat lokale kanë raportuar se vrasja ka të ngjarë të ketë lidhje me krimin e organizuar.
Pamjet e publikuara në rrjetet sociale tregojnë dy persona që duket se janë qëlluar në aeroport.
Një viktimë shihet e shtrirë në tokë në Terminalin 2, i cili përdoret kryesisht për fluturimet e brendshme, ndërsa tjetra shihet e bllokuar në një rrugë hyrëse jashtë terminalit.
i.b./dita
