Detaje të reja janë zbardhur në lidhje me tentativën e atentatit të ndodhur në një nga lokalet e qytetit të Elbasanit, ku autorët kanë tentuar të ekzekutojnë një person duke i vënë armën në kokë në sy të klientëve të tjerë.
Pavarësisht rrezikshmërisë së lartë të ngjarjes, mekanizmi i armës ka bllokuar goditjen, duke shmangur një tragjedi të mundshme në mes të ditës. Pamjet e kamerave të sigurisë të publikuara nga mediat kapin momentin kritik ku autori, i identifikuar nga policia si shtetasi Boriçi, i afrohet me armë në dorë shënjestrës së tij, shtetasit Kërtezi.
Pretendimi i autorit: “U hakmora për vëllanë”
Sipas burimeve nga grupi hetimor, gjatë marrjes në pyetje autori Boriçi ka pretenduar se motivi i këtij sulmi kishte të bënte me larje hesapesh për ngjarje të shkuara. Ai është shprehur se akti i tij ishte një reagim i drejtpërdrejtë hakmarrjeje për plagosjen e të vëllait nga ana e shënjestrës apo rrethit të tij shoqëror.
Dëshmia e shënjestrës: “Jetojmë normalisht prej 15 vitesh në të njëjtën lagje”
Nga ana tjetër, deklarata e vetë objektivit të këtij sulmi, Kërtezit, nxjerr në dritë një tjetër version të marrëdhënies mes palëve. Në dëshminë e dhënë përpara hetuesve, ai ka mohuar të ketë pasur konflikte të hapura ose motive hakmarrjeje me autorin.
”Kemi 15 vite që banojmë në të njëjtën lagje dhe kemi jetuar normalisht pa pasur probleme,” mësohet të jetë shprehur Kërtezi, duke e cilësuar ngjarjen të papritur dhe të paprovokuar nga ana e tij.
Hetimet e policisë
Strukturat e Policisë së Shtetit dhe Prokurorisë pranë Gjykatës së Shkallës së Parë Elbasan kanë sekuestruar të gjitha pamjet filmike nga kamerat e ambientit ku ndodhi ngjarja dhe po punojnë për zbardhjen e plotë të motiveve. Çështja po hetohet nën akuzat e “Vrasjes me paramendim” të mbetur në tentativë dhe “Mbajtjes pa leje të armëve luftarake”.
d.x. / dita
