Drejtori i Përgjithshëm i Policisë, Muhamet Rrumbullaku ka pritur delegacionin e lartë të Ministrisë së Brendshme të Arabisë Saudite, i kryesuar nga Drejtori i Drejtorisë Institucionale të Ekselencës, në Departamentin e Sigurisë Publike, Kolonel Dr. Abdullah bin Fadah Al-Ghanem.
Gjatë vizitës në Drejtorinë e Përgjithshme të Policisë, u dakordësua se implementimi i marrëveshjes do të mundësojë rritjen e efikasitetit të institucioneve ligjzbatuese në luftën kundër terrorizmit, krimeve ekonomike, krimeve kibernetike, dhe të atyre në fushën e narkotikëve.
Ndërkaq, partnerët e Arabisë Saudite vlerësuan Policinë e Shtetit, për rezultatet e arrira kohët e fundit, jo vetëm brenda vendit, por dhe në bashkëpunim me partnerët, për zhvillimin e hetimeve dhe operacioneve të përbashkëta, duke demonstruar profesionalizëm dhe besueshmëri.
Kreu i Drejtorisë Institucionale të Ekselencës i Mbretërisë së Arabisë Saudite ftoi Rrumbullakun që së bashku me një ekip ekspertësh, të vizitojë Arabinë Saudite, për të parë nga afër teknologjinë dhe metodologjitë e punës që përdor Policia arabe.
Në fund të takimit tejet miqësor, u dakordësua që ky bashkëpunim të shtrihet dhe në nivele zbatuese, me qëllim shkëmbimin e vazhdueshëm të eksperiencave më të mira, nëpërmjet trajnimeve, për të rritur forcën parandaluese dhe goditëse ndaj krimeve me karakter ndërkontinental.
p.k\dita
