Salarjon Totaj, bashkëshorti i ministres Elisa Spiropali është paraqitur këtë të martë në policinë e Tiranës, ku është marrë në pyetje për rreth dy orë lidhur me komunikimet e tij me një përfaqësuese të administratës tatimore.
Gjatë dëshmisë së tij, ai ka pranuar se ka komunikuar përmes mesazheve me punonjësen e Tatimeve, ndërsa autoritetet po verifikojnë përmbajtjen e këtyre komunikimeve dhe rrethanat e ngjarjes.
Sipas burimeve për Ora News, çështja lidhet me një kontroll tatimor të zhvilluar në biznesin e motrës së Totajt në Fier. Pas këtij kontrolli, dyshohet se ka pasur komunikime mes palëve, të cilat tashmë janë pjesë e verifikimeve hetimore.
Hetimet vijojnë për të përcaktuar nëse ka elementë të veprës penale të kanosjes. Deri në këtë fazë, autoritetet nuk kanë bërë të ditura detaje të tjera mbi përmbajtjen e mesazheve.
