Eksperti i kriminalistikës, Ervin Karamuço, tregon rrezikun e madh që vjen nga bateritë e makinave, teksa bën thirrje për kujdes të shtuar në ndërrimin e tyre. Një 13-vjeçar ndërroi jetë të mërkurën në Babrru të Tiranës dhe paraprakisht shkak dyshohet se është bërë gazi i çliruar nga bateria e një makine që ndodhej në garazhin e shtëpisë. Karamuço thotë se bateritë e makinës çlirojnë hidrogjen sulfurik, një gaz që është vdekjeprurës, sidomos në hapësira të mbyllura.
“Një këshillë që shpëton jetë: Ndërrojini bateritë e makinave në ambiente të hapura dhe me ndihmën e një tekniku. Vdekjet nga bateritë e makinave janë të rralla, por ndodhin. Një nënë me një fëmijë 3-vjeçar u asfiksuan dhe u gjetën pa shenja jete në makinë, para disa muajsh në USA. Fajtori është gazi shumë toksik i hidrogjenit sulfurik. Në kushtet e nxehtësisë së lartë nga mbingarkimi difektoz, ose nga dëmtimi i strukturës mbrojtëse të baterisë së makinës, acidi sulfurik i saj, çliron hidrogjenin sulfurik. Ky gaz është vdekjeprurës, sidomos në hapësira të mbyllura, duke dëmtuar rëndë funksionimin e aparatit respirator tek njeriu. Ngushëllime familjes për humbjen e djalit 13 vjeçar”, shkruan ai.
