Bashkimi Evropian ka prezantuar TraceMap, një platformë të re të inteligjencës artificiale (IA) e cila synon të përshpejtojë zbulimin e mashtrimeve ushqimore, ushqimit të kontaminuar dhe shpërthimeve të sëmundjeve të transmetuara nga ushqimi. Platforma tashmë është e arritshme për autoritetet kombëtare në të gjitha shtetet anëtare të BE-së, duke lehtësuar kontrollet dhe hetimet e sigurisë ushqimore.
Komisioneri Evropian për Shëndetin dhe Mirëqenien e Kafshëve, Olivér Várhelyi, e përshkroi mjetin si një “revolucion” në aftësinë e BE-së për të reaguar ndaj krizave ushqimore dhe për të mbrojtur fermerët dhe konsumatorët. Ai theksoi se TraceMap do të lehtësojë koordinimin midis vendeve dhe do të rrisë besimin e publikut në sistemet e sigurisë ushqimore.
Platforma përdor të dhëna të gjera agro-ushqimore për të ndjekur modelet tregtare dhe flukset e prodhimit në kohë pothuajse reale. Inteligjenca artificiale do të ndihmojë në vlerësimin e rrezikut, identifikimin e lidhjeve mes operatorëve dhe shpërndarjes, si dhe monitorimin e zinxhirëve të furnizimit për të mundësuar tërheqje të shpejta të produkteve të pasigurta.
Një version pilot i TraceMap u përdor gjatë tërheqjeve të fundit të formulës për foshnje në Evropë, të lidhura me përbërës të kontaminuar nga Kina.
Sipas Komisionit Evropian, njoftimet për sigurinë ushqimore në kuadër të Sistemit të Alarmit të Shpejtë për Ushqimin dhe Ushqimin e Kafshëve (RASFF) u rritën me 12% në vitin 2024, duke arritur 5,250 njoftime. Rreth një e treta e tyre ishin refuzime kufitare, kryesisht për shkak të mbetjeve të pesticidesh në fruta dhe perime nga Turqia, Egjipti dhe India. Vendet që raportuan më shumë njoftime ishin Gjermania (1,907), Holanda (1,155) dhe Italia (965).
Po ashtu, në vitin 2024, vendet evropiane raportuan 6,558 shpërthime të infeksioneve ushqimore, një rritje prej 14.5% krahasuar me vitin e kaluar, sipas Autoritetit Evropian të Sigurisë Ushqimore (EFSA). Sëmundjet më të shpeshta që transmetohen nga ushqimi ishin kampilobakterioza, salmoneloza, infeksioni STEC i shkaktuar nga E. coli dhe listerioza.
Listeria rezultoi më e rrezikshmja, duke shkaktuar numrin më të lartë të shtrimeve në spital dhe vdekjeve mes infeksioneve ushqimore në BE. Rreth 70% e të infektuarve me Listeria kërkuan kujdes spitalor, dhe 1 në 12 pacientë vdiq.
j.l./ dita
