Mercenarët e Grupit Wagner janë akuzuar nga vendet perëndimore dhe ekspertët e Kombeve të Bashkuara për shkelje të shumta të të drejtave të njeriut.
Edhe në Beograd, disa grupe ruse dhe ukrainase kundër luftës, kanë ngritur në Prokurorinë e Lartë Publike në Beograd një sërë akuzash penale në lidhje me aktivitetet e grupit ushtarak privat të Rusisë, Wagner.
Akuzat janë ngritur kundër drejtorit të Agjencisë serbe për Siguri dhe Informim (BIA) Aleksandar Vulin, ambasadorit rus në Serbi, Aleksandar Bocan Harchenko, Qendrës Humanitare ruso-serbe në Nish dhe anëtarëve të organizatës së krahut të djathtë, “Patrulla Kombëtare”.
Avokati, Çedomir Stojkoviq, ka theksuar se të gjithë janë duke punuar për të mobilizuar qytetarët e Serbisë për luftë.
“Harchenko udhëheq, Vulin parandalon punën e kundër-zbulimit, qendra në Nish është platformë dhe prandaj e kemi Wagnerin realitet”, ka shkruar Stojkoviq në Twitter.
Përveç Stojkoviqit, akuza penale kanë ngritur edhe përfaqësuesit e Shoqërisë Demokratike Ruse, pjesëtarë të asociacionit të diasporës ukrainase në Serbi dhe organizata humanitare, “Pëllumbi i Paqes”.
Akuza penale janë ngritur edhe kundër një numri të personave privatë, të punësuar nga Ambasada ruse në Beograd dhe persona tjerë privatë që janë të lidhur me Qendrën Humanitare ruso-serbe në Nish. m.b./dita