Sali Berisha ka dalë sërish në konferëncë për shtyp nga selia e PD, për të sulmuar SPAK-un, pse po e heton për aferën me klubin Partizani.
Sipas Berishës, Rama dhe personat e drejtësisë të lidhur me të kanë sulmuar reformat e pronësisë, duke e bërë këtë, siç tha ai “procesin politik të shekullit”.
Sali Berisha u shpreh se “çdo pushtet përcaktohet dhe kontrollohet nga Edi Rama përmes 4-5 larove të tij skapistë”.
Ai ka thënë se nuk do të paraqitet në gjykatë, pasi sipas tij, nuk po kryhet procesi i rregullt dhe se ka mbrojtjen e kushtetutës, konkretisht neni 73, i cili kërkon që për çdo cenim lirie të një deputeti duhet të merret autorizim nga Kuvendi i Shqipërisë.
“Dacibao politike ndaj vendimeve kolegjiale dhe ligjeve të parlamentit, në zbatim të programit të qeverisë së PD në mandatin e saj të viteve 2005-2009, për reformat në fushën e pronësisë, ekonomisë, forcave të armatosura, sportit, etj, paraqet fytyrën e vërtetë dhe kriminale të Edi Ramës dhe laro skapistëve të tij.
Dacibao e djeshme ndaj reformave, e bën këtë çështje procesin politik të shekullit.
Dje u njoha ju me njohjen monstruoze të Edi Ramës dhe larove të tij skapistë, që shkruanin në dacibaon e tyre se vendimi i qeverisë për përdorimin e letrave me vlerë për pagesën në masën 80 përqind, ky vendim sipas tyre qenka marrë për të ndihmuar dhëndrin tim, i cili kishte paguar në të holla 88.6 përqind të shumës për blerjen e objekteve të ndërtuara nga shteti komunist në tokën e familjes së tij, të grabitur 50 vite më parë.
Dhe ky vendim doli një muaj pasi ata kishin paguar 88.6 përqind të shumës për objekte të ndërtuara në tokën e konfiskuar për 50 vite më radhë”, thotë Berisha.
j.l./ dita
