Është ekstraduar ditën e sotme nga Belgjika i shumëkërkuari i drejtësisë shqiptare, Leonard Duka.
I akuzuar si kreu i klanit “Duka”, ai akuzohet se në bashkëpunim me gjashtë persona të tjerë, kanë planifikuar dhe kryer ekzekutimin e krahut të djathtë të Ervis Martinajt, Santiago Malkos.
Ai gjithashtu akuzohet se ka planifikuar vrasjen e të konsideruarit “ushtari” i Ervis Martinajt, Erigers Mihasi, si edhe për bashkëpunimin me Durim Bamin për ekzekutimin e Martinajt, fati i këtij të fundit mbetet mister edhe sot.
Duka ka mbërritur këtë të shtunë në aeroportin e Rinasit, ku është pritur nga forca të shumta të policisë dhe është tranderuar drejt burgut nën masa të rrepta sigurie.
Duka, dikur partner biznesi i Ervis Martinajt, dyshohet se për shkak të një borxhi të madh, u kthye në armik i tij, përplasje që i hapi rrugë vrasjeve dhe atentateve.
Ngjarjet kriminale u zbuluan nga zbërthimi i mesazheve në aplikacionin e koduar “Sky ECC”.
Njoftimi i Interpol Tirana:
Interpol Tirana kryen ekstradimin nga Belgjika në Shqipëri, të shtetasit të shumëkërkuar L. D.
Drejtoria e Interpol Tirana, në bashkëpunim me Interpol Bruksel dhe me strukturat e specializuara të Policisë së Shtetit, realizoi ekstradimin drejt vendit tonë, të shtetasit L. D.
Shtetasi L. D. ishte shpallur në kërkim ndërkombëtar nga Interpol Tirana, pasi Gjykata e Posaçme Kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Vrasja me dashje”, kryer në formën e veçantë të bashkëpunimit, “Mbajtja pa leje dhe prodhimi i armëve, armëve shpërthyese dhe municionit”, “Sigurimi i kushteve për vrasje”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Nga hetimet e kryera ka rezultuar se shtetasi L. D. dhe 6 shtetas të tjerë janë autorët e dyshuar të ngjarjes së ndodhur në vitin 2019, në rrugën “Xhanfize Keko”, Tiranë, ku mbeti i vrarë me armë zjarri, shtetasi S. M.
Gjithashtu, shtetasi L. D., në bashkëpunim me shtetas të tjerë, ka planifikuar vrasjen e shtetasve Er. Ma., Er. Mi. dhe të anëtarëve të tjerë të grupit të tyre.
Drejtoria e Përgjithshme e Policisë së Shtetit falënderon Zyrën e Interpol Bruksel, për bashkëpunimin, dhe njësitë e angazhuara në realizimin me sukses të operacionit të ekstradimit.
i.b./dita
