Deputeti socialist Erion Braçe ngriti sot në Kuvend shqetësimin e lidhur me zjarret që përfshijnë ndërtesat e reja të banimit.
Në fjalën e tij, Braçe theksoi se mënyrat dhe materialet e ndërtimit që po përdoren së fundmi nëpër godina të ndryshme në vend, përbëjnë rrezik për jetën e njerëzve, zjarrfikësve, si edhe po cenojnë pronat.
Sipas socialistit, fasadat e ventiluara janë një lloj kërcënimi i ri për qytetarët, që i konsideroi si një alarm, për të cilat, sipas tij, duhet të ndërmerren masa.
“Kushtet e sigurisë dhe mbrojtjes nga zjarri, kur është fakt që ngjarjet e rënda po na ndodhin në ndërtimet e reja shumë masive e mbi të gjitha të kushtueshme për blerësit e tyre, po kthehen në një shqetësim serioz. Pamjet e flakëve në këto godina tërheqin plot kureshtarë, por specialistët kanë analizuar më qartë e më kthjellët. Prej tyre buron alarmi për materialet dhe mënyrën e ndërtimit. Ndërkohë që nga institucionet ka vetëm një që ka bërë ekspertizën, që ka gjetur fëmijët si përgjegjës. Askush nuk ka folur, madje refuzojnë të flasin, të bëjnë veprime ‘mos o zot’, për arsyet e mënyrën që favorizoi flakët. Rrezikoi jetën e banorëve, zjarrfikëseve ndërkohë që prona po digjej duke shkaktuar dëme të mëdha. Të tilla godina me fasadë të ventiluar kanë rrezikun për pjesën tjetër të godinës së padjegur. Tjetra ka të bëjë me përhapjen e këtij sistemi ndërtimi që po bëhet në Shqipëri në banesa e ndërtesa banimi, institucione me të tilla fasada, materiale dhe mënyrë. Por edhe kodin e mbrojtjes nga zjarri”, tha Braçe.
j.l./ dita
