Carlo Ancelotti është emri më i lakuar për të drejtuar skuadrën kombëtare të Brazilit. Largimi i Tite pas Kupës së Botës, ka bërë që skuadra “Selecao” të jetë në kërkim të një emri me peshë, duke dashur si trajner italianin e Real Madrid. Në deklaratën e dhënë për ,BeIN Sports,, kreu i futbollit brazilian Ednaldo Rodrigues, u shpreh se Ancelotti është i preferuari i tyre. Për momentin Brazili drejtohet nga trajneri i përkohshëm, Ramon Menezes. “Nuk po them që Ancelotti ka marrë një ofertë nga ne, por ne duam të bindemi nëse ai dëshiron të vijë këtu. Kemi një plan A dhe po e them sinqerisht për herë të parë. Është e kotë ta fshehim, Ancelotti është i preferuari ynë”, tha mes të tjerash Ednaldo Rodrigues. Trajneri italian, prej vitesh një ndër më të mirët dhe më fituesit në qarkullim, ka kontratë deri në vitin 2024 me “Los Blancos”. Kjo situatë ka shkaktuat tensione të mëdha në zyrat e Realit në Madrid. Gazetat sportive spanjolle “AS” dhe “Marca” raportuan se Fiorentino Perez i ka kërkuar takim urgjent teknikut italian, për ta dëgjuar dhe kërkuar llogari, pasi zërat kanë shpërthyer pak ditë para gjysmëfinales së Champions ndej Manchester City dhe situata e krijuar godet psikologjikisht lojtarët. Nuk dihet nëse ‘autoritari’ Perez i ka kërkuar Ancelotti-t që të përgënjeshtrojë apo ta kërcënojë, teksa nesër Reali luan edhe finalen e kupës ndaj Osasuna.