Sali Berisha arriti të fusë militantët e tij në mesin e protestës së të rinjve te Ministria e Arsimit, por kjo solli përplasje të ashpra gjatë protestës së sotme. “Jo deputetët e PD-së”, “Berisha në burg”, ishin thirrjet me të cilat të rinjtë pritën demokratët, duke krijuar një kordon për të penguar bashkimin e tyre me protestën.
Një grusht militantësh të Partisë Demokratike bashkë me një gurp deputetësh iu drejtuan bulevardit “Dëshmorët e Kombit” rreth orës 12:45.
Në mungesë të Berishës, fjalën e mbajti krahu i tij i djathtë, Flamur Noka. Edhe pse ndodhej para Kryeministrisë, Noka, njësoj si Berisha, sulmet kryesore i drejtoi ndaj kreut të një partie tjetër opozitare, Arlind Qorrit. Të cilin e sulmon vazhdimisht kohët e fundit edhe Berisha.
Në orën 13:15, militantët e PD shkuan drejt Ministrisë së Arsimit, ku prej rreth një ore ishin mbledhur studentët dhe të rinjtë protestues. Por sapo mbërritën në Rrugën e Durrësit, u pritën me thirrje kundër Berishës dhe Partisë Demokratike.
“Rama në burg, Berisha në burg”, “Ju erdhi fundi”, “Opozita jemi ne”, “Arrestoni Berishën”, “Mos na e Merrni kauzën”.
Të rinjtë krijuan një kordon për të mos lejuar afrimin e deputetëve dhe militantëve demokratë,
“Çfarë dallimi ka Berisha nga Rama? Prandaj themi Berisha në burg, Rama në burg”, tha një protestues.
Mbështetësit e Berishës këmbëngulën se të rinjtë kishin nevojë për opozitën. Ndërsa thirrjet kundër Berishës, Flamur Noka ia faturoi sërish Arlind Qorit.
“PD nuk e shkul dot askush nga këtu, ata qoristat do ta marrin përgjigjen një për një”, tha Noka.
