Surpriza e Premier League këtë sezon quhet Brighton. Skuadra modeste fitoi 3-1 përballë Southamptonit, duke siguruar për herë të parë në histori pjesëmarrjen në Europë. Skuadra e Roberto De Zerbit ka siguruar zyrtarisht Conference League, ndërkohë që pret vetëm matematikën për t’u kualifikuar në Europa League.
Skocezi Evan Ferguson i dhuroi Brightonit avantazhin e dyfishtë me dy golat e tij në pjesën e parë. Mohamed Elyounoussi shkurtoi për “Shenjtorët”, tashmë të rrëzuar në Championship. Por, vendasit reaguan dhe vulosën fitoren falë golit të Pascal Gross. 61 pikë dhe vendi i gjashtë për Brightonin, një nga skuadrat me futbollin më të bukur gjatë këtij edicioni në ishull.
Pasi siguroi të enjten finalen e Conference League, West Ham festoi edhe në kampionat. Skuadra londineze triumfoi 3-1 me përmbysje ndaj Leeds United, duke siguruar zyrtarisht qëndrimin në Premier League. Skuadra udhëtuese kaloi në avantazh me anë të spanjollit Rodrigo (17’), por West Ham riktheu baraspeshën pas gjysmë ore lojë falë kapitenit Declan Rice. Goli i avantazhit për vendasit erdhi nga Jarrod Bowen (72’). Në minutat shtesë, Manuel Lanzini realizoi golin e qetësisë për skuadrën e tij.