Si pasojë e çarjes së digës së hidrocentralit të Sasaj, që ndodhet në Njësinë Administrative Lukovë, janë përmbytur disa biznese turistike, si dhe nënstacioni elektrik në zonë.
Për këtë arsye, Lukova dhe Borshi janë pa energji elektrike për disa orë.
Sipas burimeve të besueshme, alternativa e furnizimit me energji nga Nënstacioni i Kuçit është e pamundur, pasi para një muaji është hequr nënstacioni portabël që ishte instaluar në Borsh për të mbështetur sezonin turistik.
Ngjarja ka ndodhur të enjten, kur dyshohet se diga e hidrocentralit në Bunec, Lukovë, ka pësuar një çarje, duke rrezikuar përmbytje të mëtejshme.
Hidrocentrali i Sasaj, që ndodhet pranë fshatit Lukovë në bashkinë Himarë, furnizohet me ujë nga burimi i lumit të Kalasës. Përveç dëmeve në biznese, janë shënuar përmbytje edhe në aksin rrugor, i cili përdoret nga mjete të rënda.
Ky hidrocentral është përgjegjës për furnizimin me energji elektrike të zonës.
i.b./dita
