Pritja pothuajse ka marrë fund. Sonte në orën 21:00, në “Giuseppe Meazza” do të luhet ndeshja e dytë e euroderbit në Champions League ndërmjet Interit dhe Milanit.
Pas fitores 2-0 ndeshjen e parë, zikaltrit të rikthyer nga shtatë fitore radhazi me 21 gola të shënuar dhe vetëm 3 të pësuar, janë me një këmbë në finalen e Stambollit, por kuqezinjtë kanë rigjetur Rafa Leao-n, një mungesë të madhe në ndeshjen e parë dhe ëndërrojnë të përmbysin parashikimet.
Arkëtimet nga biletat janë një rekord më vete. Pothuajse 12.5 milionë euro bruto në arkat e zikaltërve. Një shifër e çmendur që do t’i lejojë Interit të arrijë të paktën 80 milionë (neto) për sezonin 2022-2023. Presidenti Ceferin dhe stafi i UEFA-s do të jenë gjithashtu të ftuar sonte nga drejtuesit e Interit.
Trajneri i Milanit Stefano Pioli është besimplotë në këtë përballje të dytë: “Ne besojmë në një përmbysje sepse ne jemi Milan, kemi treguar se dimë të luajmë ndeshje të mira dhe kam në dispozicion lojtarë që mund të gjejnë ndeshjen fituese individualisht, shpjegoi Stefano Pioli.
Trajneri Simone Inzaghi e di që derbi nuk është kurrë një ndeshje si gjithë të tjerat: “Ne kemi një avantazh që e merituam”, komentoi trajneri i Interit. Ai tha se “Jemi një hap larg ëndrrës dhe kualifikimi varet vetëm nga ne”.
p.k\dita
