Situata ligjore e Dani Alves është vështirësuar. Futbollisti është akuzuar nga një vajzë 23-vjeçare se mbrëmjen e 30 dhjetorit 2022 ai e ka dhunuar seksualisht në një club nate në Barcelonë.
Tanimë gazetari Carlos Quiloz i Antena 3 në Spanjë bën me dije se braziliani e ka pranuar se ka kryer marrëdhënie seksuale me 23-vjeçaren.
Dani Alves ndryshon kështu dëshminë për herë të katërt, teksa më herët kishte thënë se nuk e njihte vajzën në fjalë dhe se ajo po shpifte. Deklaratat e mëparshme nga futbollisti u bënë për të fshehur tradhtinë ndaj bashkëshortes, Joana Sanz.
Me këtë rrëfim, avokatët e brazilianit duhet të ndryshojnë strategjinë dhe do të fokusohen në faktin se akti ka qenë me miratimin e viktimës. Nëse gjykata nuk pranon këtë version, Alves rrezikon nga 4-12 vite burgim. Kujtojmë se mbrojtësi prej afro një muaji qëndron në burgun e sigurisë së lartë në Barcelonë.
