Virusi që shkaktoi pandeminë Covid-19 ka dalë nga një laborator, por jo me qëllim për t’u përdorur si armë.
Ky është përfundimi i studimit të klasifikuar të Departamentit të Energjisë në SHBA, dhënë Shtëpisë së Bardhë dhe ligjvënësve amerikanë.
Zbulimi i Departamentit, erdhi në një përditësim të një dokumenti nga zyra e drejtorit të Inteligjencës Kombëtare, Avril Haines.
Departamenti i Energjisë mbikëqyr një rrjet prej 17 laboratorësh amerikanë, duke përfshirë fusha të biologjisë së avancuar.
Hipotezat kontradiktore mbi origjinën e Covid-19, janë përqendruar ose në kafshë që transmetuan virusin te njerëzit, ose rrjedhjen e tij aksidentale nga një laborator kërkimor kinez në Wuhan.
Përhapja e Covid-19 i kapi organet shëndetësore botërore të papërgatitura, në fillim të vitit 2020.
Që atëherë, virusi ka shkaktuar afër 7 milionë vdekje në mbarë botën, sipas Organizatës Botërore të Shëndetësisë, dhe ndërpreu gjithashtu tregtinë dhe udhëtimin.
Gjetjet e përditësuara të Departamentit të Energjisë bien ndesh me raportet e katër agjencive të tjera të inteligjencës amerikane, që arritën në përfundimin se epidemia filloi si rezultat i transmetimit natyror nga një kafshë e infektuar. Dy agjenci të tjera mbeten të pavendosura.
Edhe vetë CIA mbetet e pavendosur mes teorive të rrjedhjes dhe transmetimit natyror, sipas studimit të Këshillit Kombëtar të Inteligjencës.
Raporti ofroi një pikëpamje konsensusi se Covid-19 nuk ishte pjesë e një programi kinez të armëve biologjike.
Këshilltari i Sigurisë Kombëtare, Jake Sullivan, pranoi të dielën se ka një “larmi pikëpamjesh” brenda agjencive të inteligjencës amerikane për këtë çështje, – raporton The Guardian.
j.l./ dita
