Deti me Greqinë, deputeti i Metës “del nga rreshti” por jo plotësisht: Çfarë më ka ndodhur me Ferid Hoxhën kur isha gazetar

Opozita nuk ka patur kritika për ministrin e ri të jashtëm, i cili në rrethe diolomatike njihet për afrinë me Berishën. Por Sekretari i Përgjithshëm i Partisë së Lirisë, Tedi Blushi, ish-gazetar ka bërë një deklaratë me tone të tjera nga foltorja e Kuvendit të Shqipërisë lidhur me emërimin e Ferit Hoxhës.

Megjithëse është përpjekur të mbrojë Berishën, deputeti i Metës ka nxjerrë zbuluar faktin se Hoxha ka pasur një rol kyç në negociatat për marrëveshjen e detit me Greqinë, duke theksuar se ai ka qenë kryenegociatori i kësaj marrëveshjeje 17 vite më parë.

Sipas Blushit, ai e ndjeu si detyrim moral dhe patriotik të bënte publik këtë fakt para deputetëve, që votuan për emërimin e Hoxhës si ministër i Jashtëm.

“Duke ndjerë sot përgjegjësi të lartë publike dhe kombëtare si deputet i Kuvendit që ka kryer një betim të shenjtë në Kushtetutë për të mbrojtur interesin kombëtar, e ndjeva detyrim moral dhe patriotik t’ju bëj të ditur një fakt tronditës,” deklaroi Blushi.

Blushi rikujtoi se në kohën kur Lulzim Basha ishte ministër i Jashtëm, Ferit Hoxha shërbente si sekretar i përgjithshëm dhe drejtonte negociatat me Greqinë për marrëveshjen e kufirit detar.

Sipas tij, në atë periudhë ai ishte gazetar dhe kishte publikuar një shkrim kritik ndaj marrëveshjes, pasi besonte se përgjegjësia i takonte ish-kryeministrit Sali Berisha.

Blushi pretendoi se dokumenti i marrëveshjes i ishte dhënë pikërisht nga Ferit Hoxha, duke shtuar se më vonë kishte mësuar se Hoxha kishte qenë negociatori kryesor i paktit me palën greke.

“Vetëm emri im u përmend si denoncues i marrëveshjes, ndërsa informacionin e merrja nga Ferit Hoxha. Më vonë mësova i shokuar se marrëveshjen nuk e kishte negociuar Berisha, por kryenegociatori Ferit Hoxha, i cili bënte lojë të dyfishtë,” u shpreh Blushi.

Deputeti ish-gazetar bëri mirë që e denobcoi këtë episod por përpjekja për të mbrojtur Berishën e çoi në një paradoks: Si mundet një kryenegociator të marrë përsipër të ‘vetëvendosë’ për një çështje kaq të rëndësishme ku flitet për interesa kombëtare, pa marrë miratimin e qeverisë, në këtë rast kryeministrit Sali Berisha?

Blushi ndër të tjera tha se këtë informacion e ndau me presidentin Ilir Meta, në momentin kur në tryezë erdhi kërkesa për dekretimin e Ferit Hoxhës ambasador në OKB.

Kreu i grupit parlamentar të PS, Taulant Balla, replikoi me Blushin duke i kërkuar se përse këto informacione nuk i kishte bërë publike më parë.

Balla gjithashtu tha dhe se Ilir Meta e ka dekretuar 3 herë si ambasador Ferit Hoxhën, pra një akt që e ka kryer në dijeni të plotë për çka Blushi denoncoi sot.

Ndërkohë nuk vonoi as reagimi i Ilir Metës nga qelia, i cili tha se në dy raste, e ka dekretuar ambasador Ferit Hoxhën pa dëshirën e tij.

“Por ju keni një “të drejtë” sepse dy herë e kam firmosur jashtë vullnetit tim, për këto arsye që po jua bëj publike, në pamundësi për t’u takuar nga afër. Së pari, pasi jam njohur me këto fakte, është e vërtetë që e kam firmosur si ambasador për në UNESCO vetëm për arsye njerëzore, për shkak të një tragjedie familjare që i kishte ndodhur.

Nuk kam dashur ta firmos si ambasador në OKB dhe këto arsye ja kam thënë edhe Ministres së Jashtme të asaj kohe, për arsye se ishte një pozicion i rëndësishëm dhe historik sepse Shqipëria merrte Presidencën e Këshillit të Sigurimit, e cila ishte iniciuar që në kohën që Z. Besnik Mustafaj ishte Ministër i Jashtëm”, shkroi Meta.

o.p. / dita