Presidenti i Venezuelës, Nicolas Maduro, ka akuzuar SHBA-në për krijimin e një lufte të re, pasi dërgoi anijen luftarake më të madhe në botë drejt Karaibeve.
“Ata po sajojnë një luftë të re të përjetshme”, tha Maduro për mediat shtetërore. “Ata premtuan se nuk do të përfshiheshin më kurrë në një luftë, dhe po sajojnë një luftë.”
SHBA-të kanë rritur praninë e tyre ushtarake në Karaibe, duke dërguar anije luftarake, një nëndetëse bërthamore dhe avionë F-35 në atë që e quajnë një fushatë për të synuar trafikantët e drogës.
Gjithashtu ka kryer dhjetë sulme ajrore ndaj anijeve që thotë se u përkasin trafikantëve. Sekretari amerikan i Mbrojtjes, Pete Hegseth tha se gjashtë narko-terroristë u vranë gjatë sulmeve.
Ky operacion u zhvillua në Detin e Karaibeve, kundër një anijeje që Hegseth tha se i përkiste organizatës kriminale Tren de Aragua. Sulmet janë dënuar në rajon dhe ekspertët kanë vënë në pikëpyetje ligjshmërinë e tyre.
Në njoftimin e së premtes, Pentagoni tha se transportuesi luftarak USS Gerald R Ford do të vendoset në zonën e përgjegjësisë së Komandës Jugore të SHBA-së, e cila përfshin Amerikën Qendrore dhe Amerikën e Jugut, si dhe Karaibet.
“Forcat shtesë do të rrisin dhe shtojnë kapacitetet ekzistuese për të ndërprerë trafikimin e narkotikëve dhe për të degraduar e çmontuar TCO-të, ose organizatat kriminale transnacionale”, tha zëdhënësi Sean Parnell.
Sulmi i njoftuar të premten ishte i dhjeti që administrata Trump ka ndërmarrë kundër trafikantëve të dyshuar të drogës që nga fillimi i shtatorit. Shumica kanë ndodhur në Amerikën e Jugut, në Karaibe, por më 21 dhe 22 tetor ajo kreu sulme në Oqeanin Paqësor.
j.l./ dita
