Prokuroria e Tiranës urdhëron riekspertimin mjekoligjor për kushërinjtë Bilbil e Jashar Maja. Riekspertimi do të kryhet nga një grup prej 3 ekspertësh. Ekspertimi i parë është bërë më 24 korrik, ndërsa më shumë se dy muaj nga ngjarja kërkohet riekspertimi.
Dy ditë më parë, Prokuroria e Tiranës lehtësoi akuzën për anëtarët e fisit Rraja në lidhje me episodin e dhunës ndaj Bilbil e Jashar Majas. Ndryshe nga nisja e hetimit për “plagosje të rënë me dashje, në bashkëpunim”, pas publikimit të dhunës me shkop bejsbolli prokuroria ka vlerësuar që hetimi duhet të vijojë për akuzën e “plagosjes së lehtë me dashje”.
Ndryshimi i kualifikimit ka ardhur pas administrimit të akt-ekspertimeve mjeko-ligjore ndaj të dëmtuarve. Përveç lehtësimit të pozitës penale, akuza e re kërkon ankim nga të dëmtuarit për vijimin e hetimit.
Çka do të thotë, nëse Bilbil e Jashar Maja nuk kërkojnë hetimin e dhunuesve të tyre, çështja penale ndaj Rrajave mund të pushohet. Kujtojmë se pas ngjarjes së rëndë, Rrahman Rraja dorëzoi mandatin e deputetit pasi i përfshirë në episodin e dhunshëm ishte i biri Rexhep Rraja dhe familjarë të tjerë të tij. Sherri mes tyre nisi për shkak të gurores në Borizane, pasi fisi Maja ankohej se aktiviteti i saj i kishte dëmtuar banesat.
