Ekipeve të shpëtimit që po kërkojnë për nëndetësen e zhdukur Titan, pranë rrënojave të Titanikut në Atlantik u kanë mbetur vetëm disa orë para se pesë personave në nëndetëse t’u mbarojë oksigjeni.
Sipas parashikimeve të ekspertëve, kjo do të ndodhë sot dhe problemi kryesor është se si të shkohet në nëndetëse.
Nëndetësja Victor 6000 u dërgua për të ndihmuar në operacionin e shpëtimit pas një kërkese nga Marina e SHBA.
Victor 6000 mund të zhytet në një thellësi prej 6,000 metrash dhe mund ta ngrejë Titanin nëse ka ngecur në fundin e oqeanit.
Nga ana tjetër nëndetësja Titan ka një furnizim 96-orësh me oksigjen në rast emergjence dhe Roja Bregdetare amerikane parashikon që furnizimi me oksigjen në nëndetësen Titan do të përfundojë sot në orën 13:08.
Në nëndetëse ndodhen pesë persona: një miliarder britanik, një pilot francez i nëndetëses, një biznesmen pakistanez dhe djali i tij 19-vjeçar, si dhe drejtori ekzekutiv i kompanisë që menaxhon Titan.
Dyshohet se nëndetësja e zhdukur të dielën mbrëma, ka ngecur në rrënojat e Titanikut teksa ishte në një ekspeditë, ka ndodhur një mosfunksionim ose thjesht ka humbur kontaktin me centralin, por është ende në funksion. Por gjithashtu ka ekspertë të tjerë që i kanë shuar shpresat.
Nëndetësja zakonisht dërgon sinjale në anijen e saj mëmë çdo 15 minuta, por sinjalet nuk u morën për disa orë pas zhytjes.
Në bordin e nëndetëses ndodhen: Hamish Harding, një eksplorues dhe biznesmen britanik 58-vjeçar, i cili është kryetar i firmës së avionëve “Action Aviation”; Biznesmeni miliarder pakistanez Shahzada Daëood dhe djali i tij Suleman; Është raportuar gjerësisht se Stockton Rush, CEO i OceanGate – kompania që organizoi misionin – është në bord gjithashtu; Eksploruesi francez 73-vjeçar, Paul-Henry Nargeolet, mendohet të jetë gjithashtu në bord, sipas një postimi në Facebook nga Harding para fillimit të zhytjes.
j.l./ dita
