Kryeredaktori i Top Channel, Altin Kreka gjatë një interviste televizive tregoi platformën që përdorën personat anonimë për të dërguar faktet në redaksinë e Top Channel. Sipas tij, ato flasin për implikimin e ish kryetares së LSI-së dhe deputetes së Partisë të Lirisë, Monika Kryemadhi në lidhje ruse.
Kreka tha se personat anonimë përdorën platformën Proton, e regjistruar në Zvicër, e krijuar nga disa shkencëtarë që kanë si parim bazë ruajtjen e privatësisë dhe të dhënave personale të përdoruesve. Kryeredaktori i TCH, tha se për shkak të sigurisë së lartë, është shumë e vështirë që kjo platformë të gjurmohet.
“Të dhënat që ne kemi publikuar pak ditë më parë kanë mbërritur në e-mailin zyrtar të redaksisë së Top Channel disa ditë më parë, rreth datës 22 dhe ne nga ajo datë deri në këtë moment kemi marrë kohën tonë për t’i verifikuar. Në dijeninë time këto të dhëna nga një burim anonim kanë mbërritur edhe në media të tjera, arsye perse s’i kanë publikuar mbase i shpjegojnë ata. Por ne vendosëm, morëm një vendim editorial pas verifikimeve që bëmë për t’i publikuar”, u shpreh Kreka.
Sipas tij, e fakteve janë dokumente publike që tregojnë lidhjen e personave të permendur në këtë investigim që është bërë dhe që neve na u vu në dijeni.
“Janë dokumente dhe burime të hapura si Forbes, burime të dokumenteve të Pandora Papers. Çdokush mund t’i kërkojë personazhet e ndryshëm, aksionerët e këtyre kompanive që janë sanksionuar nga Perëndimi për lidhjet e tyre me Putin, apo partitë që mbështet Putin, apo kompani që janë dënuar për korrupsion apo punë të pista”, tha kryeredaktori i Top Chanel.
Top Channel publikoi fakte autentike të cilat mbërritën në redaksitë tona nga burime anonime dhe që flasin për implikimin e ish kryetares së LSI dhe deputetes së Partisë së Lirisë në lidhje ruse.
Këto fakte janë faturat bankare, llogaritë bankare në disa banka në Zvicër dhe Portugali e Qipro nga të cilat Kryemadhi ka marrë dhe ka dërguar para në kompani offshore që ishin në zotërim nga aksionerët kryesorë të lidhur ngushtësisht me politikat dhe me vetë presidentin e Rusisë, Vladimir Putin, partinë e tij.
m.b./dita
