Dhëndri i Sali Berishës , Jamarbër Malltezi foli sot për mediat lidhur me vendimin e GJKKO për të shtyrë në datë 15 shtator gjyqin ndaj tij për dosjen “Partizani”.
Teksa foli për një drejtësi të manipuluar, Jamarber Malltezi tha se gjyqtarët e GJKKO nuk janë të lirë dhe se kontrollohen nga qeveria.
Ai tha se KLGJ duhet të shprehej brenda 15 ditëve lidhur me rastin e Irena Gjokës, por një gjë e tillë nuk ka ndodhur as tani pas 15 muajsh.
“Faza hetimore nga Irena Gjoka është nul. Janë akte të pavlefshme, Rama ka marrë gjithë sistemin e drejtësisë, ka bllokuar KLGJ. KLGJ sipas ligjit duhet të shprehet për 15 ditë, kanë kaluar 15 muaj dhe ende s’është shprehur, pra shkelja është bërë rutinë nga drejtësia e kapur nga Rama.
Gjyqtarët e GJKO nuk janë të pavarur. Ne kemi dhjetëra dëshmitarë që kanë dhënë dëshmi të rreme sepse janë shtyrë në dëshmi të rreme nga prokurorë. Ky është një shtet sazesh…”, u shpreh Malltezi.
Është shtyrë procesi gjyqësor edhe për Sali Berishën.
Avokati Genc Gjokutaj nga seanca ka thënë se ‘Gjyqtarët nuk ofrojnë gjykim të paanshëm pasi janë nën vëzhgim nga SPAK. Kemi një kërkesë për të përjashtuar treshen gjykuese nga procesi’.
Ish-kryeministri Sali Berisha dhe dhëndri i tij, Jamarbër Malltezi janë nën akuzë për korrupsion e pastrim parash.
j.l./ dita
