Presidenti amerikan Donald Trump ka publikuar në rrjetin e tij social Truth një foto ku shfaqet me kryeministren italiane Giorgia Meloni, vetëm pak përpara samitit të rëndësishëm të NATO-s në Ankara, i parashikuar për 7 dhe 8 korrik.
Fotoja, e publikuar të dielën në orën 22:51, një ditë pas festimeve të 4 Korrikut, tregon Melonin me Trump, gjatë samitit të G7-s në Evian.
Mbi imazh shfaqet mbishkrimi “Duhet një urdhër ndalimi”.
Ky veprim konsiderohet si një tjetër sulm i drejtpërdrejtë ndaj kryeministres italiane, pas disa ditësh tensionesh mes Romës dhe Uashingtonit.
Pas samitit të Evianit, Trump kishte deklaruar se Meloni i ishte lutur për një foto së bashku. Kryeministrja italiane iu përgjigj akuzës përmes një videoje në rrjetet sociale, ku tha: “Unë dhe Italia nuk lutemi kurrë”.
Lëvizja e presidentit amerikan e shton më tej tensionin përpara samitit të NATO-s, i cili nis nesër pasdite në Ankara. Takimi pritet me interes të madh, pasi do të mbledhë krerët e shteteve dhe qeverive të vendeve anëtare të Aleancës. Në qendër të diskutimeve do të jetë e ardhmja e NATO-s, në një periudhë kur kohezioni i saj po vihet në provë.
Prej javësh, ekspertët dhe përfaqësuesit diplomatikë të qeverive po punojnë për të shmangur një përplasje mbi çështjen kryesore: sa duhet të kontribuojë secili vend për mbrojtjen e përbashkët.
Ministri italian i Mbrojtjes, Guido Crosetto, tha se samiti “është ndërtuar për të shkuar mirë”. Sipas tij, angazhimet do të respektohen dhe çdo vend do të paraqitet me hapa konkretë në drejtimin që kishte premtuar.
Çështja kryesore për vendet evropiane mbetet objektivi për të çuar shpenzimet e mbrojtjes në 5 për qind të Prodhimit të Brendshëm Bruto. Crosetto u shpreh se nuk sheh më shumë probleme se në samitin e kaluar dhe parashikoi që takimi të jetë i shkurtër, me një kohëzgjatje prej tre ose katër orësh.
Megjithatë, ai pranoi se mbetet një faktor i paparashikueshëm, qëndrimi i Trumpit.
“Çfarë do të bëjë Trump, do ta shohim”, tha Crosetto.
Presidenti amerikan pritet të takohet të mërkurën në Ankara me presidentin ukrainas Volodymyr Zelensky. Gjatë javëve të fundit, Trump ka kritikuar disa partnerë evropianë për atë që ai e konsideron bashkëpunim të pamjaftueshëm në luftën kundër Iranit.
Sekretari i përgjithshëm i NATO-s, Mark Rutte, është përpjekur të zbusë tensionet, megjithëse shkaktoi debat me një deklaratë për përdorimin e bazave italiane nga Shtetet e Bashkuara.
Rutte u ka bërë thirrje vendeve anëtare të NATO-s që të mos mjaftohen vetëm me rritjen e buxheteve të mbrojtjes, por t’i kthejnë sa më shpejt fondet e reja në armë efektive dhe forca të armatosura më të afta.
Sipas tij, një vit më parë bëhej fjalë kryesisht për premtime për rritjen e shpenzimeve, ndërsa tani kërkohen rezultate konkrete. Pikërisht këto rezultate kërkon edhe Trump, i cili pritet të mos shfaqë harmoni të madhe me kryeministren italiane pas publikimit të fotos dhe rikthimit të akuzës se ajo kishte kërkuar me këmbëngulje një mundësi fotografimi me të në samitin e G7-s.
Pavarësisht deklaratave të fundit të presidentit amerikan, mediat amerikane raportojnë se ai mund të jetë duke rritur presionin për të favorizuar industrinë amerikane të armëve. Megjithatë, vendet evropiane, përfshirë Italinë, janë të vetëdijshme se do të duhet të bëjnë më shumë për mbrojtjen e tyre.
j.l./ dita
