Dy ditë pas sherrit, i vihet tritol biznesit të reperit Noizy në Durrës

Një shpërthim me eksploziv është regjistruar orët e para të mëngjesit të sotëm në Durrës.

Burime bëjnë të ditur se eksplozivi është vënë në lokalin në plazh në pronësi të reperit Rigels Rajku, apo i njohur ndryshe si Noizy.

Nga shpërthimi në lokalin e Noizyt janë dëmtuar xhamat në të dy katet e ndërtesës. Fatmirësisht nga shpërthimi në lokalin e Noizyt nuk ka të lënduar, vetëm dëme materiale.

Kujtojmë se dy ditë më parë Noizy u përfshi në sherr me Kleviol Ahmetin (Cllevio Serbiano) .

Thuhet se sherri ka filluar pasi ky i fundit ka folur kundër reperit në rrjete sociale. Pas lirimit nga burgu, Klevio ka ofenduar sërish anëtarët e OTR.

Dje, ai ka vendosur që të shkojë tek lokali i Noizyt në Durrës por duket që kjo gjë nuk u prit mirë nga ky i fundit dhe e gjithë situata ka agravuar në përleshje. Dje janë  publikuar dhe pamjet e plota, ku shihet Noizy së bashku me ish konkurrentin e “Për’puthen”, Geljan Rajku teksa “masakrojnë” me grushte Cllevion.

Policia ka reaguar lidhur me eksplozivin që iu vendos një nga bizneseve të Rigels Rajkut.

Sipas policisë tritoli ka shpërthyer rreth orës 04:24, në lagjen Nr.13, në një ambient (butik rrobash) të marrë me qira nga shtetasi Bashkim Rajku.

Njoftimi i Policisë:

Durrës – Më datë 08.06.2022, rreth orës 04:24, në lagjen Nr.13, në një ambient (butik rrobash) të marrë me qira nga shtetasi Bashkim Rajku., ka shpërthyer një sasi lënde eksplozive.

Si pasojë ka vetëm dëme materiale.

Grupi hetimor nën drejtimin e Prokurorisë vijon hetimet për zbardhjen e ngjarjes, identifikimin e kapjen e autorit/ve.

j.l./ dita