Rënia e presidentit sirian Bashar al Assad në orët e para të mëngjesit të së dielës i dha fund pushtetit të tij 24-vjeçar.
Me një ofensivë surprizë, grupet rebele të udhëhequra nga lëvizja “Hayat Tahrir al Sham” mbushën rrugët e qytetit, pasi ishin nisur nga Alepo drejt Damaskut.
Tani, liderët botërorë dhe zyrtarë ndërkombëtarë kanë reaguar sa me lehtësim, aq edhe me kujdes.
Në një fjalim televiziv, kancelari gjerman Olaf Scholz deklaroi se Assad ka dhjetëra mijëra jetë të pafajshme në ndërgjegjen e tij dhe e fajësoi për krijimin e eksodit nga Siria.
“Ajo që ka rëndësi tani është që në Siri të vendosen rendi dhe ligji. Të gjitha komunitetet fetare, të gjitha grupet etnike dhe pakicat duhet të gëzojnë mbrojtje. Të gjithë sirianëve u duhet dhënë mundësia që të jetojnë me dinjitet dhe vetëvendosje. Ne do ta gjykojmë qeverinë e ardhshme siriane nga këto”, tha Olaf Scholz, kancelar i Gjermanisë.
Shefja e Politikës së Jashtme të BE-së, Kaja Kallas deklaroi se rënia e regjimit të Assad ishte një zhvillim pozitiv dhe i shumëpritur.
“Ai tregon gjithashtu dobësinë e mbështetësve të Assad, Rusisë dhe Iranit. Prioriteti ynë është të garantojmë sigurinë në rajon. Unë do të punoj me të gjithë partnerët konstruktivë në Siri dhe rajon”, tha Kallas në rrjetin “X”.
Duke folur nga Shtëpia e Bardhë, presidenti Joe Biden u shpreh se “më në fund regjimi i Assad ra”, duke e quajtur këtë rrëzim një “akt themelor drejtësie”.
“Ajo që pamë nga e gjithë kjo, për herë të parë në histori, është se as Rusia, as Irani dhe as Hezbollahu nuk mund të mbronin regjimin e urryer sirian. Ky është një rezultat direkt i goditjeve që kanë dhënë Ukraina dhe Izraeli, me mbështetjen e palëkundur të Shteteve të Bashkuara”, u shpreh Biden.
Në një deklaratë të shkruar, sekretari i përgjithshëm i OKB-së, Antonio Guterres mirëpriti fundin e “regjimit diktatorial” sirian dhe bëri thirrje për rindërtimin e vendit.
“Pas 14 vitesh luftë brutale dhe rënies së regjimit diktatorial, sot populli sirian ka mundësinë historike të ndërtojë një të ardhme të qëndrueshme dhe paqësore”, u shpreh ai.
Megjithatë, mesazhet e ndërkombëtarëve për lehtësim dhe për një të ardhme të re për Sirinë janë ndalur nga frika se vendi mund të bjerë në kaos.
Dhe me Sirinë në udhëkryq, ajo që do të ndodhë është e paparashikueshme.
